حیدرآباد: وزیراعلیٰ اے Revanth Reddyنے ہفتہ کے دن ریاست کے مختلف اضلاع میں شدید بارشوں کے پیش نظر تمام سرکاری محکموں اور فیلڈ اسٹاف کو ہائی الرٹ رہنے کی ہدایت دی۔
انہوں نے محکمہ موسمیات کی رپورٹ کا حوالہ دیتے ہوئے کہا کہ جکتیا ل کو چھوڑ کر ریاست کے 15 اضلاع میں بھاری تا انتہائی بھاری بارش ریکارڈ کی گئی ہے۔ انہوں نے انتباہ دیا کہ نظام آباد، سنگاریڈی، میدک، وقارآباد ، جئے شنکر بھوپال پلی ، مُلوگ ، بھدرادری کھمم اور کھمم اضلاع میں مزید بارش کے امکانات ہیں۔
وزیراعلیٰ نے صبح کے وقت اعلیٰ عہدیداروں کے ساتھ صورتحال کا جائزہ لیا۔ انہوں نے کہا کہ ایس ڈی آر ایف اور این ڈی آر ایف کی ٹیمیں متاثرہ اضلاع میں پہلے ہی تعینات ہیں اور ضلع کلکٹروں کے ساتھ مل کر راحت و بچاؤ کارروائیاں انجام دے رہی ہیں۔
انہوں نے ضلع حکام کو ہدایت دی کہ ابلتے نالوں اور وادیوں پر مسلسل نظر رکھیں اور نشیبی علاقوں میں رہنے والے خاندانوں کو فوری طور پر راحت کیمپوں میں منتقل کریں۔ آبپاشی کے عہدیداروں کو ہدایت دی گئی کہ وہ ذخائر، تالابوں اور کنووں میں پانی کی سطح پر چوبیس گھنٹے نظر رکھیں اور فل ریزروائر کی سطح پر ریت کے تھیلے تیار رکھیں۔
وزیراعلیٰ نے ہدایت دی کہ زیرآب سڑکوں، نچلے پلوں اور کاز ویز پر ٹریفک مکمل طور پر بند کردیا جائے اور پولیس و ریونیو عہدیدار ان مقامات پر بیریکیڈس لگاکر مسلسل نگرانی کریں۔
ریونت ریڈی نے اس بات پر زور دیا کہ بارش کے بعد ٹھہرے ہوئے پانی میں مچھروں کی افزائش اور بیماریوں کے پھیلنے کا خطرہ ہے۔ انہوں نے شہری اور دیہی علاقوں میں صفائی مہم تیز کرنے کی ہدایت دی۔ محکمہ صحت کو ضروری ادویات کا ذخیرہ رکھنے اور ضرورت پڑنے پر طبی کیمپس قائم کرنے کی ہدایت دی گئی۔
مزید برآں انہوں نے ریونیو، برقی، پنچایت راج، روڈ اینڈ بلڈنگس، صحت، میونسپل، پولیس، فائر سروسز اور ایس ڈی آر ایف محکموں کو آپس میں ہم آہنگی کے ساتھ کام کرنے کی ہدایت دی تاکہ جان، مال اور مویشیوں کا کم سے کم نقصان ہو۔
حیدرآباد میں انہوں نے جی ایچ ایم سی، ڈیزاسٹر ریسپانس فورس، ایس ڈی آر ایف اور فائر سروسز کو شہریوں کی شکایات پر فوری ردعمل ظاہر کرنے کی ہدایت دی۔
