Hyderabad: Telangana ke Jagitial zila ke Metpally ilaqe mein police ne 3 afraad ko giraftar kiya hai jo apne aap ko sahafi zahir karke ek truck operator se bhatta wasool kar rahe thay. Police ke mutabiq mulziman ne sand truck ke malik ko jhooti khabar chhapanay ki dhamki de kar paisay maangay.
Sub-Inspector Kiran Kumar ne bataya ke giraftar afraad mein Tari Raj Shekhar (Medipally), Boda Devkar (Ibrahimpatnam) aur Nanpu Ravi Raju (Metpally) shamil hain. Police ne teenon ko hirasat mein le kar adalati tahweel mein bhej diya hai.
Truck operator ko dhamka kar 10,000 rupay maangay
Police report ke mutabiq, Nizamabad ke Parkal ilaqe ke rehaishi Tirumalashetty J. Babu apne walid Nageshwar Rao ke saath 21 October ki raat NH63 par rait le ja rahe thay. Jab unka truck Metpally police station ke qareeb pohancha, to 2 bikes par sawar 3 afraad ne gaadi rok li aur jhooti news chhapanay ki dhamki de kar 10,000 rupay talab kiye.
J. Babu ne foran 5,000 rupay de diye magar baqi rakam se inkar kar diya. Isi doran police ki patrol team moqa par pahunch gayi jise dekh kar mulziman wahan se farar ho gaye.
Shikayat par fauri action, mulziman hirasat mein
J. Babu ki shikayat par police ne fauri action lete hue teenon afraad ko giraftar kar liya. Un par bhatta khori aur farzi sahafi ban kar dhamkane ke ilzam mein mukadma darj kiya gaya hai.
Sub-Inspector Kiran Kumar ne kaha ke public ko chahiye ke agar koi shakhs khud ko sahafi batakar paisay maangay ya dhamkaye, to foran police ko ittila dein taake aise jurm ka rokh tham sakein.
