حیدرآباد: ریاستی وزیر ٹرانسپورٹ اور ضلع انچارج پونم پربھاکر نے کانگریس قائدین پر زور دیا ہے کہ وہ Jubilee Hills bypollمیں پارٹی کی کامیابی کے لیے متحد ہوکر کام کریں۔ انہوں نے کہا کہ جوبلی ہلز کے حلقہ میں کانگریس کا پرچم لہرانا ضروری ہے۔
ہفتہ کو وزیر کے کوارٹرز میں منعقدہ اجلاس سے خطاب کرتے ہوئے پونم پربھاکر نے ایراگڈہ ڈویژن کے بوتھ انچارجز اور کانگریس قائدین کو مخاطب کیا۔ اجلاس میں محمد اظہرالدین، اے وینکٹ رام ریڈی، تلنگانہ ڈیری فیڈریشن کے چیئرمین گوتھا امیت ریڈی، این ایس یو آئی کے ریاستی صدر وینکٹا سوامی اور دیگر اہم قائدین شریک ہوئے۔
پونم پربھاکر نے ہدایت دی کہ ڈویژن اور بوتھ سطح پر کوآرڈینیشن کمیٹیاں تشکیل دی جائیں تاکہ مقامی مسائل کی نشاندہی اور ان کے حل کے لیے اقدامات کیے جا سکیں۔ انہوں نے کہا کہ ایراگڈہ میں کانگریس کارکنان گھر گھر پہنچ کر عوام سے براہ راست رابطہ کریں۔
انہوں نے اعلان کیا کہ وہ جی ایچ ایم سی عہدیداروں اور حیدرآباد کلکٹر کے ساتھ ڈویژن کا دورہ کریں گے تاکہ التواء میں پڑے ترقیاتی کاموں بالخصوص سڑکوں کی مرمت کو فوری طور پر مکمل کرایا جا سکے۔ ان کا کہنا تھا کہ وہ پیدل دورہ کریں گے تاکہ شہری مسائل کا جائزہ لے کر ان کا حل یقینی بنایا جا سکے۔
ریاستی بہبود اسکیمات کا حوالہ دیتے ہوئے پونم پربھاکر نے کہا کہ راشن کارڈ کی تقسیم، معیاری چاول کی سربراہی، اندرامہ ہاؤسنگ اور شہری ترقی کے منصوبے ہر گھر تک پہنچنے چاہئیں۔ انہوں نے پارٹی کیڈر پر زور دیا کہ ان فلاحی اسکیمات کے فوائد کو ضمنی انتخاب سے قبل عوام تک پہنچایا جائے۔
