حیدرآباد: ریاستی وزیر برائے سڑک و عمارات اور سنیماٹوگرافی کومٹ ریڈی وینکٹ ریڈی نے بدھ کے روز اعلان کیا کہ ’ینگ انڈیا انٹیگریٹڈ ریزیڈنشیل اسکول‘ Young India Schoolکا سنگ بنیاد 4 اگست 2025 کو نلگنڈہ میں رکھا جائے گا۔ یہ اسکول حکومت تلنگانہ کا ایک نمایاں تعلیمی منصوبہ ہے، جس کا مقصد پسماندہ طبقات کے طلبہ کو عالمی معیار کی تعلیمی سہولیات فراہم کرنا ہے۔
اسی دن نلگنڈہ میں تعمیر شدہ نئے وزیر کیمپ آفس کا افتتاح بھی عمل میں آئے گا۔
اپنے حیدرآباد کیمپ آفس میں منعقدہ جائزہ اجلاس کے دوران کومٹ ریڈی وینکٹ ریڈی نے کہا کہ YIIRS پسماندہ طبقات، درج فہرست ذاتوں، درج فہرست قبائل، اور اقلیتی برادریوں کے طلبہ کو معیاری تعلیم اور جدید انفراسٹرکچر فراہم کرنے کی سمت ایک سنگ میل ثابت ہوگا۔
یہ منصوبہ 22 ایکڑ پر محیط ہوگا، جس میں 5.36 لاکھ مربع فٹ سے زائد تعمیراتی رقبہ ہوگا، اور اس پر 200 کروڑ روپۓ کی لاگت آئے گی۔ اسکول میں تعلیمی بلاکس، رہائشی کوارٹرز، اسکل ڈیولپمنٹ سنٹر، کھیل کود کی سہولیات، عصری تھیٹر، اور وسیع میدان شامل ہوں گے۔ منصوبے کی تکمیل کی مدت 18 ماہ مقرر کی گئی ہے۔
وزیر نے متعلقہ عہدیداروں کو ہدایت دی کہ وہ ذاتی نگرانی سے تعمیری معیار اور وقت پر تکمیل کو یقینی بنائیں۔ انہوں نے وزیر اعلیٰ کا شکریہ ادا کرتے ہوئے کہا کہ نلگنڈہ کے لیے اس اسکول کی منظوری ایک انقلابی موقع ہے، جو محروم طبقات کے طلبہ کی تقدیر بدل سکتا ہے۔
اس جائزہ اجلاس میں ایگزیکٹیو انجینئر بالا پرساد، کنسلٹنٹس اور دیگر سینئر محکمہ جاتی عہدیدار شریک ہوئے۔
About the Author
