حیدرآباد ۔ تلنگانہ حکومت آج Local Body Elections کے انعقاد سے متعلق ایک اہم فیصلہ کرنے والی ہے۔ وزیر اعلیٰ اے ریونت ریڈی اس سلسلے میں پنچایت راج کے عہدیداروں کے ساتھ اجلاس منعقد کریں گے۔ اجلاس جمعہ کو ہوگا جس میں وزیر پنچایت راج سیتاکا، چیف سکریٹری سری دھر اور کمشنر سروجنا بھی شریک ہوں گے۔ حکومت نے اس معاملے پر ہائی کورٹ سے مزید وقت طلب کرنے کا فیصلہ کیا ہے، کیونکہ عدالت نے 30 ستمبر تک انتخابات مکمل کرنے کی ہدایت دی ہے۔
سرکاری ذرائع کے مطابق وزیر اعلیٰ آج بلدی انتخابات میں پسماندہ طبقات کو 42 فیصد ریزرویشن فراہم کرنے کے مسئلے پر بھی فیصلہ کریں گے۔ یہ بل اسمبلی سے منظور ہوچکا ہے لیکن تاحال صدر جمہوریہ کی منظوری کا منتظر ہے۔
بی سی ریزرویشن پر حکومتی غور و خوض
اطلاعات کے مطابق ریونت ریڈی اس بات پر بھی وضاحت دے سکتے ہیں کہ آیا حکومت بی سی ریزرویشن کے لیے جی او جاری کرے گی یا نہیں۔ ضلعی حکام کو پہلے ہی حکومت کی ہدایات کے مطابق فہرستیں تیار کرنے کی ہدایت دی جاچکی ہے۔ جیسے ہی پنچایت راج محکمہ باضابطہ احکامات جاری کرے گا، ہر ضلع میں ریزرویشن کی فہرستیں سرکاری طور پر جاری کر دی جائیں گی۔
حکومتی ذرائع پر امید ہیں کہ آئندہ چند دنوں میں قانونی اور انتظامی رکاوٹیں دور کر کے Local Body Elections کے عمل کو آگے بڑھایا جائے گا۔
