حیدرآباد: انفورسمنٹ ڈائریکٹوریٹ (ای ڈی) نے 260 کروڑ روپئے مالیت کے ایک وسیع Cryptoسائبر فراڈ نیٹ ورک کا پردہ فاش کرتے ہوئے دہلی، نوئیڈا، گڑگاؤں اور دہرادون میں 11 مقامات پر چھاپے مارے۔ اس نیٹ ورک کے ذریعہ جعلسازی اور منی لانڈرنگ کی سرگرمیاں کرپٹو کرنسی اور ہنڈی راستوں کے ذریعہ انجام دی جا رہی تھیں۔
ای ڈی کے مطابق، مجرم خود کو پولیس یا تحقیقاتی اداروں کے افسر ظاہر کر کے شہریوں کو دھوکہ دیتے تھے۔ کئی کیسز میں وہ مائیکروسافٹ، ایمازون جیسے عالمی ٹیک کمپنیوں کے نمائندے ہونے کا دعویٰ کرتے ہوئے عوام کو رقم منتقل کرنے پر مجبور کرتے تھے۔
جعلساز کرپٹو اور ہنڈی کے ذریعے رقوم متحدہ عرب امارات منتقل کرتے تھے
تحقیقات میں انکشاف ہوا کہ جعلساز فراڈ سے حاصل شدہ رقوم کو کرپٹو کرنسی میں تبدیل کر کے مختلف والٹس میں تقسیم کرتے تھے۔ یہ رقوم اکثر بٹ کوائن میں رکھی جاتیں، جس کے بعد انہیں Tether (USDT) جیسے اسٹیبل کوائن میں تبدیل کیا جاتا۔ بعد ازاں، ہنڈی ایجنٹس کے ذریعے یہ کرپٹو اثاثے متحدہ عرب امارات میں نقد رقم میں تبدیل کیے جاتے۔
یہ نیٹ ورک مالیاتی نگرانی سے بچنے کے لیے کرپٹو کرنسی کا سہارا لیتا تھا، جس نے بین الاقوامی سطح پر مالی جرائم کے لیے ڈی سنٹرلائزڈ پلیٹ فارمز کے غلط استعمال پر سوالات اٹھا دیے ہیں۔
سی بی آئی اور دہلی پولیس پہلے ہی اس نیٹ ورک کے خلاف متعدد ایف آئی آر درج کر چکی ہیں۔ ای ڈی نے بتایا کہ وہ رقوم کی ترسیل کے مکمل راستے کی نشاندہی اور پورے نیٹ ورک کو ختم کرنے کے لیے تحقیقات جاری رکھے ہوئے ہے۔
