حیدرآباد: کمشنر ٹاسک فورس (ساؤتھ زون) اور فلک نما پولیس نے ایک بڑی کارروائی کرتے ہوئے قتل کی سنگین [en]Murder Conspiracy[/en] کو ناکام بنا دیا اور پانچ مشتبہ افراد کو گرفتار کر لیا، جو حال ہی میں پیرول پر رہا ہونے والے ایک شخص کو قتل کرنے کی سازش کر رہے تھے۔ پولیس نے ان کے قبضے سے 40,000 روپئے نقد رقم اور موبائل فونز برآمد کیے۔
گرفتار ملزمان کی شناخت سید فیاض (39)، سید ظفر الدین عرف ابّو (40)، محمد خلیل الدین (30)، محمد ابراہیم (30)، اور سید یونس عرف اجّو (28) کے طور پر کی گئی ہے۔ تمام ملزمان حیدرآباد کے رہائشی ہیں۔
پولیس کے مطابق، سید فیاض، جو رئیل اسٹیٹ کے کاروبار سے وابستہ ہے اور غیر قانونی زمین کے معاملات میں ملوث بتایا جا رہا ہے، نے سابق مخالف مجاہد عرف مجّو کو ختم کرنے کے لیے سازش رچی تھی۔ مجاہد حال ہی میں قتل کے مقدمے میں قید کاٹنے کے بعد پیرول پر رہا ہوا تھا۔ فیاض نے مبینہ طور پر قتل کے لیے 15 لاکھ روپئے کی رقم طے کی تھی، جس میں سے ابتدائی طور پر 40,000 روپئے ادا کیے گئے۔
ٹاسک فورس اور فلک نما پولیس نے معتبر ذرائع سے اطلاع ملنے پر کارروائی کرتے ہوئے معاملہ بے نقاب کیا۔ پولیس نے سیکشن 61(2)(a) کے تحت مقدمہ درج کرتے ہوئے سازش میں شامل افراد اور برآمد اشیاء کو فلک نما پولیس کے حوالے کر دیا ہے، جہاں مقدمہ نمبر Cr. No. 268/2025 کے تحت تفتیش جاری ہے۔
یہ کارروائی انسپکٹر ایس راگھویندر (ٹاسک فورس ساؤتھ زون) اور انسپکٹر کے آدی ریڈی (فلک نما پولیس اسٹیشن) کی نگرانی میں انجام دی گئی، جبکہ سب انسپکٹرز نوین، سمیع الزماں، ایم مہیش اور ان کی ٹیموں نے بھرپور تعاون فراہم کیا۔
پولیس نے اس بات پر زور دیا ہے کہ شہر میں کسی بھی طرح کے جرائم یا سازشوں کو برداشت نہیں کیا جائے گا، اور عوام سے اپیل کی ہے کہ وہ مشتبہ سرگرمیوں کی اطلاع فوری طور پر دیں۔
