حیدرآباد: مونتھا طوفان کے مشرقی ساحل کے قریب پہنچنے کے ساتھ ہی حیدرآباد میں اگلے دو دن کے دوران تیز ہواوں کے ساتھ موسلادھار بارشوں اور ممکنہ سیلاب کا خدشہ ظاہر کیا گیا ہے۔ موسمیات کے محکمے نے انتباہ جاری کرتے ہوئے کہا کہ شہر کو طوفان کے اثرات منگل کی شام سے محسوس ہونے لگیں گے۔
محکمہ کا انتباہ، شہر بھر میں احتیاطی تدابیر | Cyclone Montha
محکمہ کے مطابق، شہر کے مختلف حصوں میں ہلکی سے درمیانی بارش متوقع ہے، جبکہ کچھ علاقوں میں گرج چمک کے ساتھ شدید بارش ہو سکتی ہے۔ حکام نے خبردار کیا کہ بارش کی شدت کے باعث پانی جمع ہونے اور ٹریفک میں رکاوٹ کے امکانات بڑھ سکتے ہیں۔
طوفان تیزی سے شدت اختیار کر رہا ہے۔ محکمہ موسمیات کے ماہر جی این آر ایس سرینواس راؤ نے بتایا کہ ، “کل صبح تک یہ شدید طوفان کی شکل اختیار کر لے گا اور شام یا رات تک مچھلی پٹنم اور کلینگا پٹنم کے درمیان کاکیناڈا کے قریب ساحل سے ٹکرائے گا۔”
آندھرا و تلنگانہ میں شدید اثرات متوقع | Cyclone Montha
زمین سے ٹکرانے کے بعد طوفان شمال-شمال مغرب کی سمت میں تلنگانہ کی طرف بڑھے گا، جس کے نتیجے میں آندھرا پردیش کے ساحلی اضلاع میں انتہائی شدید بارش اور تیز ہواؤں کا سامنا ہو سکتا ہے۔
محکمہ موسمیات کی سات روزہ پیشگوئی کے مطابق، 29 اکتوبر سے ہلکی سے درمیانی بارش کا سلسلہ شروع ہوگا، جبکہ 31 اکتوبر سے موسلا دھار بارشوں کا امکان ہے۔ سرینواس راؤ نے کہا کہ “کل شام سے حیدرآباد میں بارش کے وقفے وقفے سے سلسلے جاری رہیں گے، اس لیے شہری غیر ضروری سفر سے گریز کریں۔”
تلنگانہ کے کئی اضلاع میں الرٹ | Cyclone Montha
محکمہ موسمیات نے پیداپلّی، جے شنکر بھوپال پلی، اور مُلّوگ اضلاع کے لیے اورنج الرٹ، جبکہ نرمل، نظام آباد، کاماریڈی، میدک، سنگاریڈی، اور وقارآباد کے لیے یلو الرٹ جاری کیا ہے۔ حکام نے عوام سے اپیل کی ہے کہ وہ گھروں میں رہیں، نچلے علاقوں سے دور رہیں، اور ہنگامی صورتحال میں انتظامیہ سے رابطہ کریں۔
درجہ حرارت اور نمی کی صورتحال | Cyclone Montha
ہفتے کے دوران حیدرآباد کا درجہ حرارت 30 تا 32 ڈگری سینٹی گریڈ کے درمیان رہنے کا امکان ہے جبکہ بارش والے دنوں میں نمی 88 فیصد تک پہنچ سکتی ہے۔ چونکہ زمین پہلے ہی نم ہے، اس لیے ہلکی بارش بھی بعض علاقوں میں پانی جمع ہونے اور ٹریفک جام کا سبب بن سکتی ہے۔
انتظامیہ نے شہریوں کو مشورہ دیا ہے کہ وہ محکمہ موسمیات کی تازہ ترین اطلاعات پر نظر رکھیں اور ممکنہ طور پر مونتھا طوفان کے زیرِ اثر شدید موسمی حالات کے لیے تیار رہیں۔
About the Author
