حیدرآباد: تلنگانہ میں غیر متوقع مانسون اور بے لگام پانی کے استعمال کی وجہ سے زیر زمین پانی کا ذخیرہ شدید بحران کا شکار ہوتا جا رہا ہے۔ یہ انکشاف نیشنل جیو فزیکل ریسرچ انسٹیٹیوٹ (این جی آر آئی) کی حالیہ تحقیق میں سامنے آیا ہے۔
ماہرین کے مطابق ریاست میں بارش کے پیٹرن میں تبدیلی اور مٹی کی پانی جذب کرنے کی صلاحیت میں کمی کے باعث قدرتی ری چارج کی رفتار کم ہو رہی ہے، جبکہ پانی کی طلب—خاص طور پر دھان کی کاشت کے لیے—مسلسل بڑھ رہی ہے۔ تحقیق میں کہا گیا کہ تلنگانہ کے سخت پتھریلے علاقوں میں بارش کا پانی زیر زمین جانا مشکل ہو گیا ہے۔
ماہرین نے 2002 سے 2020 تک سیٹلائٹ پر مبنی GRACE (گریویٹی ریکوری اینڈ کلائمٹ ایکسپیریمنٹ) ڈیٹا کا تجزیہ کرتے ہوئے سطحی اور زیر زمین پانی کی تبدیلیوں کو ٹریک کیا۔ انہوں نے پایا کہ اگر بارش میں 10 سے 20 فیصد کمی ہو جائے تو ری چارج کی شرح میں 50 فیصد تک کمی آ سکتی ہے۔
تلنگانہ کو سالانہ اوسطاً 110 بلین کیوبک میٹر بارش حاصل ہوتی ہے، مگر اس میں سے صرف 15 فیصد پانی زیر زمین جاتا ہے۔ اس میں سے تقریباً 15 بلین کیوبک میٹر صرف دھان کی کاشت میں استعمال ہوتا ہے۔ کئی علاقوں میں 85 فیصد زرعی ضروریات زیر زمین پانی پر منحصر ہیں۔
تحقیق کے مطابق بارش کا پانی زیر زمین آبی ذخائر تک پہنچنے میں عام طور پر ایک سے دو ماہ لگاتا ہے، جبکہ پتھریلے علاقوں میں جھیلوں اور ذخائر کی موجودگی بھی پانی جذب کرنے میں مددگار نہیں ہے۔
مستقبل کے موسمیاتی اندازے بتاتے ہیں کہ ریاست میں بارش کی مقدار 15 سے 50 فیصد تک بڑھ سکتی ہے، مگر درجہ حرارت میں بھی 0.3 سے 2.93 ڈگری سیلسیس تک اضافہ متوقع ہے، جو صورتحال کو مزید بگاڑ سکتا ہے۔
تحقیقی ٹیم کے رکن ڈاکٹر ابھیلاش کمار پاسوان نے، جو ناراکولا سرینواس راؤ، ایل رگھو اور وریندرا مانی تیواری کے ساتھ اس مطالعہ میں شریک تھے، خبردار کیا کہ گزشتہ تین دہائیوں میں زرعی استعمال کے لیے زیر زمین پانی کا استعمال تین گنا بڑھ چکا ہے۔ انہوں نے کہا کہ اگر حکومت نے دھان کی کاشت پر قابو نہیں پایا اور عوامی شعور نہ بیدار کیا گیا، تو زرعی آبادی کا نصف حصہ شدید بحران سے دوچار ہو جائے گا۔
یہ تحقیق حال ہی میں یورپی انجینیئرز اور جیو سائنسدانوں کی انجمن کے جریدے میں شائع ہوئی ہے۔
About the Author
