حیدرآباد: 4 اگست کو وزیراعلیٰ ریونت ریڈی کی صدارت میں Telangana Cabinetکا اہم اجلاس منعقد ہوگا، جس میں کالیشورم لفٹ ایریگیشن پروجیکٹ میں بے قاعدگیوں سے متعلق جسٹس پی سی گھوش کمیشن کی رپورٹ کا جائزہ لیا جائے گا۔
حکومت نے رپورٹ کے مطالعے کے لیے اعلیٰ سطحی کمیٹی تشکیل دی ہے جس میں آبپاشی، عمومی انتظامیہ اور قانون محکموں کے سیکریٹریز شامل ہیں۔ یہ کمیٹی رپورٹ کا تجزیہ کر کے کابینہ کو آئندہ لائحہ عمل پر مشورہ دے گی۔
ذرائع کے مطابق اگر رپورٹ میں مالی یا انتظامی بے ضابطگیاں ثابت ہوئیں تو حکومت ممکنہ کارروائی پر فیصلہ کرے گی۔ اجلاس میں آئندہ اسمبلی سیشن کی تاریخوں کو بھی حتمی شکل دیے جانے کا امکان ہے۔
واضح رہے کہ کالیشورم لفٹ ایریگیشن اسکیم ریاست کے سب سے مہنگے منصوبوں میں سے ایک ہے، اور کمیشن کو اس میں مبینہ بے ضابطگیوں کی تحقیقات کے لیے مقرر کیا گیا تھا۔ حکومت کا حتمی فیصلہ کمیٹی کی تجزیاتی رپورٹ موصول ہونے کے بعد متوقع ہے۔
