حیدرآباد: ممبئی پولیس نے تلنگانہ سے چلنے والے ملک کے سب سے بڑے منشیات نیٹ ورکس میں سے ایک کا پردہ فاش کیا اور حیدرآباد کے قریب ایک کیمیکل یونٹ سے تقریباً 12,000 کروڑ روپۓ مالیت کی Mephedrone (ایم ڈی) ضبط کی۔
میرا-بھائندر، وسئی-ویرار (ایم بی وی وی) پولیس نے کئی ہفتوں کی نگرانی اور خفیہ آپریشن کے بعد اس ریکٹ کو بے نقاب کیا۔ پولیس کے مطابق چرلاپلی صنعتی علاقے میں واقع یہ فیکٹری “واگدیو لیبز” کے نام سے رجسٹرڈ تھی، لیکن اندر ہی اندر بڑے پیمانے پر میفڈرون تیار کی جا رہی تھی۔
12,000 کروڑ روپۓ کی منشیات ضبط
چھاپے کے دوران پولیس نے جدید کیمیکل ساز و سامان، ڈرگ پروڈکشن یونٹس اور 32,000 لیٹر سے زیادہ کیمیکلز برآمد کیے۔ اس کے علاوہ 100 گرام Mephedrone اور 25 لاکھ روپۓ نقد بھی ضبط کیے گئے۔
پولیس نے کم از کم 12 افراد کو گرفتار کیا ہے جن میں ایک غیر ملکی شہری بھی شامل ہے۔ گرفتار شدگان میں فیکٹری کا مالک اور کیمسٹ سرینواس اور اس کا ساتھی تناجی پاتھے بھی شامل ہیں۔
مختلف ریاستوں میں پھیلا ہوا نیٹ ورک
تحقیقات سے پتہ چلا ہے کہ چرلاپلی میں تیار کی جانے والی میفڈرون مہاراشٹر سمیت کئی دیگر ریاستوں میں سپلائی کی جا رہی تھی۔ فیکٹری کا لائسنس ایک ڈھال کے طور پر استعمال کیا گیا تاکہ بڑے پیمانے پر منشیات کی تیاری کو چھپایا جا سکے۔ پولیس کا کہنا ہے کہ یہ ملک میں منشیات کی سب سے بڑی برآمدگیوں میں سے ایک ہے۔
