حیدرآباد: آندھرا پردیش کے شہر تروپتی میں ایک شخص نے سڑک پر لاٹھی کے ساتھ اندھا دھند حملہ[en]Tirupati Attacker[/en] کر کے خوف و ہراس پھیلا دیا، جس کے نتیجے میں ایک شخص ہلاک اور دو زخمی ہو گئے۔ یہ واقعہ علی پیری پولیس اسٹیشن کے قریب پیش آیا۔
پولیس کے مطابق، حملہ آور نے سب سے پہلے 55 سالہ بھکاری شیکھر پر وار کیا، جس کے بعد قریبی پارکنگ ایریا میں کام کرنے والے ایس سبرا منیم اور کے کلپنا کو نشانہ بنایا۔ تینوں کو فوری طور پر روئیا اسپتال منتقل کیا گیا، جہاں شیکھر زخموں کی تاب نہ لاتے ہوئے دم توڑ گیا، جبکہ دیگر دو افراد زیر علاج ہیں۔
عینی شاہدین کا کہنا ہے کہ یہ شخص تقریباً ایک گھنٹے تک لاٹھی لہراتے ہوئے سڑکوں پر گھومتا رہا اور شہریوں و پولیس کو چکمہ دیتا رہا۔ لوگ خوف کے مارے قریب جانے سے کتراتے رہے اور پورے علاقے میں افرا تفری پھیل گئی۔
بالآخر سب انسپکٹر لوکیش، کانسٹیبل ایس پراکاش اور بلدی عملے نے مشترکہ کارروائی کرتے ہوئے جال کی مدد سے حملہ آور کو قابو میں لیا۔ اس کے قبضے سے ایک چاقو بھی برآمد ہوا ہے۔
ابتدائی تحقیقات کے مطابق، حملہ آور کا تعلق ممکنہ طور پر تمل ناڈو سے ہو سکتا ہے۔ پولیس مزید تفتیش کر رہی ہے تاکہ اس کے عزائم اور پس منظر کا پتہ لگایا جا سکے۔
