حیدرآباد: بی آر ایس قیادت نے بدھ کے روز سائبرآباد پولیس کمشنر کے دفتر میں شکایت درج کروائی ہے، جس میں دعویٰ کیا گیا کہ پارٹی کے ایم ایل سی Shambhipur Raju کو مسلسل دھمکی آمیز کالیں موصول ہو رہی ہیں۔ شکایت پارٹی کے ایم ایل سی اور قانون ساز کونسل میں اپوزیشن لیڈر مدھو سدھن چاری کی قیادت میں دی گئی۔
میڈیا سے بات کرتے ہوئے مدھو سدھن چاری نے کہا کہ شامبھی پور راجو تلنگانہ تحریک کے ایک اہم رہنما رہے ہیں اور آج بھی بی آر ایس کے تنظیمی ڈھانچے میں کلیدی کردار ادا کر رہے ہیں۔ انہوں نے کہا کہ راجو کو 60 لاکھ بی آر ایس کارکنان کی حمایت حاصل ہے، اور ہم نے مطالبہ کیا ہے کہ کالز کی مکمل تحقیقات کی جائیں اور ذمہ دار افراد کے خلاف سخت کارروائی کی جائے۔
مدھو سدھن چاری نے سابق وزیر ماینم پَلّی ہنمنت راؤ پر بھی سنگین الزامات لگاتے ہوئے کہا کہ وہ غنڈہ گردی پر اتر آئے ہیں اور لوگوں کو کھلے عام ڈرا دھمکا رہے ہیں۔ انہوں نے کہا کہ وزیراعلیٰ کو اس معاملے کا فوری نوٹس لینا چاہیے اور ایسے عناصر کے خلاف سخت قدم اٹھانا چاہیے۔
پارٹی نے پولیس سے مطالبہ کیا ہے کہ اس معاملے کو سنجیدگی سے لیا جائے اور شامبھی پور راجو کی سلامتی کو یقینی بنایا جائے۔
