حیدرآباد: سابق ہندوستانی وکٹ کیپر اور 1983 کے عالمی کپ فاتح Syed Kirmani نے ہفتہ کے روز وزیراعلیٰ تلنگانہ اے ریونت ریڈی سے ان کی رہائش گاہ واقع جوبلی ہلز میں ملاقات کی۔ اس موقع پر وزیر ویویک وینکٹ سوامی بھی موجود تھے۔
سید کرمانی نے حکومت تلنگانہ کی کھیلوں کے فروغ سے متعلق پالیسیوں کی تعریف کی اور کہا کہ ریاست میں نوجوانوں کے اندر چھپی ہوئی صلاحیتوں کو تلاش کرنا اور اُنہیں مناسب تربیت فراہم کرنا وقت کی اہم ضرورت ہے۔
وزیراعلیٰ ریونت ریڈی نے کرمانی کے شاندار کیریئر اور ہندوستانی کرکٹ میں ان کے کردار کی ستائش کی اور کہا کہ ریاستی سطح پر نوجوان کھلاڑیوں کے لیے ان کی رہنمائی نہایت قیمتی ثابت ہو سکتی ہے۔
اس موقع پر سید کرمانی نے اپنی خودنوشت “Stumped” وزیراعلیٰ کو بطور تحفہ پیش کی۔ کرمانی کا تعلق اگرچہ پیدائشی طور پر چنئی سے ہے (پیدائش 29 دسمبر 1949)، تاہم ان کے خاندان کی جڑیں حیدرآباد سے وابستہ ہیں۔ انہوں نے 1976 سے 1986 تک ہندوستانی ٹیم کی نمائندگی کی اور وکٹ کے پیچھے اپنی مہارت اور بیٹنگ میں قابلِ بھروسا کارکردگی کے لیے جانے جاتے تھے۔ سال 1982 میں ان کی خدمات کے اعتراف میں انہیں پدم شری ایوارڈ سے نوازا گیا۔
About the Author
