حیدرآباد: ہندوستانی محکمہ موسمیات کی جانب سے آئندہ تین دنوں کیلئے جاری وارننگ کے بعد، تلنگانہ حکومت نے بدھ کے روز حیدرآباد میں Hyderabad Heavy Rainsکے پیش نظر الرٹ جاری کرتے ہوئے شہری حدود میں ہنگامی بنیادوں پر ریسکیو اور بلدیہ ٹیموں کو متحرک کر دیا۔
وزیر شہری امور پونم پربھاکر نے سی وی آنند (کمشنر پولیس)، ضلع کلکٹر داسری ہری چندنا، جی ایچ ایم سی کمشنر آر وی کرنا، ہائیڈرا کمشنر رنگناتھ، میٹرو واٹر ورکس اور ٹریفک ڈپارٹمنٹ کے ساتھ ایک ہنگامی جائزہ اجلاس منعقد کیا۔
انہوں نے شہری علاقوں کے 141 نشیبی اور پانی جمع ہونے والے مقامات پر فوری طور پر خصوصی عملے کی تعیناتی کی ہدایت دی۔ این ڈی آر ایف اور ایس ڈی آر ایف ٹیموں کو الرٹ پر رکھا گیا ہے۔ جی ایچ ایم سی کو موسی ندی کے کیچمنٹ ایریاز اور دیگر حساس مقامات پر پیشگی وارننگ جاری کرنے کی ہدایت دی گئی۔
گزشتہ ہفتے بارش کے بعد شہر میں پیدا ہونے والے ٹریفک جام اور پانی کے نکاسی میں تاخیر پر ناراضی کا اظہار کرتے ہوئے پربھاکر نے ہدایت دی کہ اس بار ایسی صورتحال نہ ہونے دی جائے۔ انہوں نے تمام محکموں کو بارش کے زیادہ امکانات والے اوقات سے قبل مربوط تیاری کا حکم دیا۔
جیڈی میٹلہ، کوکٹ پلی اور پکٹ نالوں سے حسین ساگر جھیل میں پانی کی آمد میں اضافے کے بعد، جھیل کی سطح 513.34 میٹر تک پہنچ گئی ہے جو کہ فل ٹینک سطح کے قریب ہے۔ اس کے پیش نظر پانی کے اخراج کیلئے سلویس گیٹس کھول دیئے گئے ہیں۔
ممکنہ ٹریفک مسائل کے پیش نظر سائبرآباد ٹریفک پولیس نے آئی ٹی کمپنیوں کو ورک فرام ہوم کی تجویز دی ہے تاکہ عملے کی غیر ضروری نقل و حرکت کم ہو اور ٹریفک میں خلل نہ پڑے۔ حکام نے شہریوں سے اپیل کی ہے کہ وہ ضروری احتیاط برتیں اور متعلقہ محکموں کی ہدایات پر عمل کریں۔
About the Author
