Hyderabad: Andhra Pradesh ke district Kurnool mein tomato ugane wale kisano ne prices mein tez girawat ke khilaf sakh ehtijaj kiya. Paathikonda mandi mein wholesale rate sirf ₹1 per kg tak gir gaya. Is wajah se kisano ne apni fasal seedha road par fek di, jis se Goothy–Mantralayam road par traffic block ho gaya.
Is silsile mein, kisano ne hukumat se foran munasib qeemat faraham karne ka mutalba kiya. Unka kehna tha ke agar sarkar ne turant mudakhlat nahi ki, to unki mushkilat barh jaayengi.
Kurnool mein fasal aur qeemat ka crisis:
Andhra Pradesh tomato production mein mulk bhar mein sab se aage hai. Yahan 62,000 hectare zameen par har saal 22.17 lakh ton tomatoes ugaye jaate hain. Sirf Kurnool mein 4,800 hectare par 1.67 lakh ton tak ki paidawaar hoti hai.
Yeh fasal do seasons mein hoti hai — Kharif (August se October) aur Rabi (December se April). Paathikonda mandi state ki doosri sab se badi tomato mandi hai. Lekin bar-bar qeemat mein utar-chadhav kisano ke liye nuqsan ka sabab banta hai.
Hukoomati iqdamat aur siyasi rad-e-amal:
Sarkar ne is saal Dodda Konda mein 2.5 acre zameen par ₹11 crore ke kharche se tomato processing unit banane ka elan kiya hai. Yeh project CM Chandra Babu Naidu ke election promise ka hissa hai. Maqsad yeh hai ke kisano ki paidawaar zaya na ho.
Dusri taraf, YSR Congress ke leader YS Jagan Mohan Reddy ne sarkar ko tanqeed ka nishana banaya. Unka kehna tha, “Kurnool mein pyaaz ₹3 aur tomato ₹1.50 per kg mil raha hai. Kya in daamon par kisaan zinda reh sakta hai?” Unho ne market ko stable karne ke liye foran action lene ka mutalba kiya.
About the Author
