حیدرآباد: سینئر کانگریس لیڈر و سابق رکن پارلیمان وی ہنومنت راؤ نے پیر کے روز مرکز سے مطالبہ کیا کہ وہ پسماندہ طبقاتBC Reservations بڑھانے کی راہ میں حائل 50 فیصد کی آئینی حد بندی کو ختم کرے۔ انہوں نے بی جے پی کو چیلنج دیا کہ اگر وہ واقعی سماجی انصاف کی حامی ہے تو اس مطالبہ کی حمایت کرے۔
گاندھی بھون میں ایک پریس کانفرنس سے خطاب کرتے ہوئے وی ہنومنت راؤ نے کہا کہ بی جے پی ہمیشہ سے بی سی طبقات کے خلاف جانبداری کا مظاہرہ کرتی آئی ہے۔ انہوں نے حالیہ ریاستی بی جے پی صدر کے انتخاب کا حوالہ دیتے ہوئے الزام لگایا کہ پارٹی نے دو اہل بی سی امیدواروں کو نظرانداز کرتے ہوئے ایک اوپن کٹیگری امیدوار کو منتخب کیا۔
انہوں نے کہا کہ انہیں شبہ ہے کہ وزیر اعظم نریندر مودی کبھی بھی بی سی طبقات کے حق میں قانون سازی کی حمایت کریں گے۔ ان کے بقول مودی کا سیاسی ریکارڈ ظاہر کرتا ہے کہ وہ بی سی برادری کے مسائل کو سنجیدگی سے نہیں لیتے۔
وی ہنومنت راؤ نے تلنگانہ کے وزیر اعلیٰ ریونت ریڈی کی ستائش کرتے ہوئے کہا کہ موجودہ کانگریس حکومت نے مرکز کے ساتھ بہتر تال میل کے ذریعے وہ نتائج حاصل کیے ہیں جو سابق وزیر اعلیٰ کے چندر شیکھر راؤ ایک دہائی میں نہیں حاصل کر سکے۔
انہوں نے اعلان کیا کہ ریاستی حکومت آئندہ مقامی ادارہ جات کے انتخابات میں بی سی ریزرویشن کے تحت بی سی طبقات کو 42 فیصد تحفظات فراہم کرے گی۔
About the Author
