حیدرآباد:تلنگانہ ہائی کورٹ نے بدھ کے روز ریاست کے اعلیٰ آئی اے ایس افسران کو توہین عدالت کے نوٹس جاری کیے کیونکہ وہ دسمبر 2023 کے اس عدالتی حکم پر عمل درآمد کرنے میں ناکام رہے جس میں 2023–24 کے دوران مچھلی بیج فراہم کرنے والے سپلائرز کو ادائیگی کا حکم دیا گیا تھا۔
جسٹس این وی شروَن کمار نے برہمی کا اظہار کرتے ہوئے کہا کہ عدالتی حکم کے باوجود نہ تو مقررہ وقت میں ادائیگیاں کی گئیں اور نہ ہی عدالت میں جوابی حلف نامے داخل کیے گئے۔ عدالت نے گزشتہ موقع پر حتمی موقع دیا تھا کہ 16 جولائی تک عمل درآمد کی رپورٹ پیش کی جائے۔
عدالت نے محکمہ حیوانات اور ماہی پروری کے اسپیشل چیف سکریٹری سبیاساچی گھوش، فنانس سکریٹری سندیپ کمار سلطانیہ، فشریز کمشنر پرینکا آلا، ڈپٹی ڈائریکٹر ٹی سرینواس، اور ناگر کرنول، ونپرتی اور ملگ کے کلکٹروں کو 30 جولائی کو عدالت میں ذاتی طور پر پیش ہونے کا حکم دیا ہے تاکہ بتایا جا سکے کہ ان کے خلاف توہین عدالت کی کارروائی کیوں نہ کی جائے۔
درخواست گزاروں بشمول سری متسیا فشرریز فارمز نے الزام لگایا کہ محکمہ نے ان کے فراہم کردہ مچھلی بیج کی ادائیگی نہیں کی۔ عدالت نے دسمبر میں ہدایت دی تھی کہ ویجیلنس کمیشن کی رپورٹ کی بنیاد پر تمام اہل سپلائرز کو ادائیگیاں کی جائیں۔
درخواست گزاروں کے وکیل ڈی ایل پندو اور دیگر نے بدھ کے روز عدالت کو آگاہ کیا کہ تاحال کوئی ادائیگی نہیں کی گئی اور نہ ہی کوئی رپورٹ داخل ہوئی ہے۔ اس پر عدالت نے رجسٹری کو حکم دیا کہ مذکورہ افسران کو توہین عدالت کے نوٹس فوری جاری کیے جائیں۔
