حیدرآباد: تلنگانہ حکومت نے ریاست میں ونائک چترتھی اور دسہرہ تقاریب کے موقع پر گنیش اور درگا پنڈالز کو Free Electricityسربراہی کا اعلان کیا ہے۔ اس سہولت سے ہزاروں جشن کمیٹیاں مستفید ہوں گی۔
پیشگی اجازت نامہ حاصل کرنا لازمی
تلنگانہ سدرن پاور ڈسٹری بیوشن کمپنی لمیٹڈ نے اس اسکیم کے سلسلے میں باضابطہ احکامات جاری کر دیے ہیں۔ عہدیداروں نے بتایا کہ یہ سہولت 27 اگست سے 6 ستمبر تک ونائک نو راتری تقاریب اور 29 ستمبر سے 12 اکتوبر تک درگا نو راتری تقاریب کے دوران لاگو ہوگی۔ تاہم صرف وہی منتظمین اہل ہوں گے جنہیں پیشگی اجازت نامہ حاصل ہو۔
اسی دوران ریاستی پولیس نے پُرامن اور محفوظ تقاریب کے انعقاد کے لیے خصوصی ہدایات جاری کی ہیں۔ منتظمین کو پولیس ڈپارٹمنٹ کے آن لائن پورٹل کے ذریعے اجازت نامہ حاصل کرنے کے ساتھ ساتھ برقی کمپنی سے کلیئرنس لینا ضروری ہوگا۔ اس کے علاوہ پنڈالز کی تنصیب کے لیے لائسنس یافتہ ماہرین کی خدمات حاصل کرنا لازمی قرار دیا گیا ہے۔
ڈی جے کے استعمال پر پابندی
پولیس نے واضح کیا ہے کہ سڑکیں مکمل طور پر بند نہ کی جائیں، جبکہ لاؤڈ اسپیکرز رات 10 بجے کے بعد بند کر دیے جائیں۔ آواز کی سطح حکومت کی مقررہ حد کے اندر ہونی چاہیے۔ ہر پنڈال پر سی سی ٹی وی کیمرے اور فائر سیفٹی کے آلات نصب کرنا لازمی ہوگا، جبکہ ڈی جیز کے استعمال پر مکمل پابندی عائد کر دی گئی ہے۔
حیدرآباد ساؤتھ زون کی ڈپٹی کمشنر پولیس سنہا مہرا نے گنیش اتسو منتظمین کے ساتھ رابطہ اجلاس منعقد کیا۔ انہوں نے بھروسہ دلایا کہ بتوں کے انسٹالیشن سے لے کر وسرجن تک سخت سیکیورٹی فراہم کی جائے گی۔ ساتھ ہی خبردار کیا کہ آتشبازی، ڈی جیز یا کسی اشتعال انگیز حرکت پر فوری کارروائی کی جائے گی۔ انہوں نے عقیدتمندوں سے اپیل کی کہ وہ پُرامن طریقے سے جشن منائیں اور پولیس کے تعاون سے وسرجن جلوس کو جلد مکمل کریں۔
⚡️ Govt of Telangana to provide free power supply:
🔸 Ganesh pandals – 27 Aug to 6 Sept 2025 (11 days)
🔸 Durga pandals – 24 Sept to 2 Oct 2025 (9 days)#GaneshChaturthi2025 #tgspdcl #iprtelangana @tgspdcl pic.twitter.com/j7EEvBmLnZ— IPRDepartment (@IPRTelangana) August 24, 2025
