حیدرآباد: تلنگانہ کے وزیر اعلیٰ ریونت ریڈی نے پروفیسر کے. Jayashankarکی یومِ پیدائش کے موقع پر انہیں شاندار خراج عقیدت پیش کرتے ہوئے کہا کہ تلنگانہ حکومت ریاست کے قیام کے اُن اصولوں اور نظریات کی پابند ہے جن کے لیے جئے شنکر نے اپنی پوری زندگی وقف کر دی۔
ریونت ریڈی نے کہا کہ پروفیسر جئے شنکر نے حیدرآباد ریاست کے آندھرا پردیش میں انضمام کی مخالفت کی تھی اور اس کے نتیجے میں ہونے والی ناانصافی کے خلاف چھ دہائیوں تک علمی، نظریاتی اور عوامی سطح پر آواز بلند کی۔
جئے شنکر: تلنگانہ کے نظریاتی معمار
وزیر اعلیٰ نے انہیں “تلنگانہ تحریک کا نظریاتی معمار” قرار دیا اور کہا کہ جئے شنکر محض ایک ماہر تعلیم نہیں بلکہ ایک ایسا وژنری رہنما تھے جنہوں نے تلنگانہ کے تشخص، انصاف اور خودمختاری کے لیے نظریاتی بنیادیں فراہم کیں۔
ریونت ریڈی نے کہا کہ جئے شنکر نے ہمیشہ تلنگانہ کی علیحدہ ریاست کے لیے سائنسی بنیادوں پر دلائل، زمینی حقائق اور واضح نظریاتی موقف کے ساتھ جدوجہد کی، جس نے تحریک کو زندہ رکھا اور نئی نسل کو راہ دکھائی۔
وزیر اعلیٰ نے اعادہ کیا کہ ریاستی حکومت جئے شنکر کے مشن کو جاری رکھے گی اور تلنگانہ کے عوام کو خودمختاری، شناخت اور انصاف دلانے کے ان کے خواب کو حقیقت بنانے میں کوئی کسر باقی نہیں رکھے گی۔
