حیدرآباد: مہدی پٹنم بس اسٹاپ کے قریب منگل کے روز تلنگانہ اسٹیٹ روڈ ٹرانسپورٹ کارپوریشن (ٹی جی ایس آر ٹی سی) کی ایک بس میں اچانک آگ بھڑک اٹھی RTC bus fireتاہم تمام مسافر بحفاظت باہر نکلنے میں کامیاب رہے۔
عہدیداروں کے مطابق یہ واقعہ اس وقت پیش آیا جب مہدی پٹنم ڈپو سے تعلق رکھنے والی بس، لنگم پلی سے واپسی پر مہدی پٹنم پہنچی۔ اچانک بس سڑک پر رک گئی، ڈرائیور نے فوری طور پر اسے سڑک کے کنارے منتقل کیا تاکہ ٹریفک متاثر نہ ہو۔
جب بس کا سیلف اسٹارٹ نظام کام نہ کیا تو ڈرائیور نے مسافروں کو نیچے اترنے کو کہا۔ بعد ازاں ڈرائیور نے انجن کیبلز چیک کرنے کے لئے سامنے کا حصہ کھولا تو اچانک انجن خانے سے آگ بھڑک اٹھی جو تیزی سے بس کے اگلے حصے میں پھیل گئی۔ عینی شاہدین کے مطابق چند منٹوں میں کثیف دھواں علاقے میں پھیل گیا اور بس کا اگلا حصہ شعلوں کی لپیٹ میں آگیا۔
اطلاع ملنے پر مقامی افراد نے فائر کنٹرول روم سے رابطہ کیا، جس کے بعد فائر بریگیڈ کی گاڑیاں موقع پر پہنچیں اور آگ پر قابو پایا۔ حکام نے تصدیق کی کہ ڈرائیور کی بروقت کارروائی اور مسافروں کا فوری انخلا کسی بڑے سانحے سے بچنے میں اہم ثابت ہوا۔
مہدی پٹنم پولیس اور ٹی جی ایس آر ٹی سی کے عہدیدار بھی موقع پر پہنچے اور جلی ہوئی بس کا معائنہ کیا۔ کارپوریشن کے ماہر مکینیکل انجینئروں کو آگ لگنے کی اصل وجہ جاننے کا کام سونپا گیا ہے۔ ابتدائی رپورٹس میں برقی شارٹ سرکٹ کا شبہ ظاہر کیا گیا ہے تاہم حکام نے کہا کہ حتمی وجہ تفصیلی جانچ کے بعد ہی معلوم ہوگی۔
بعد ازاں جلی ہوئی بس کو وہاں سے ہٹا دیا گیا تاکہ مہدی پٹنم جنکشن پر ٹریفک بحال ہوسکے۔ حکام نے یقین دلایا کہ مستقبل میں ایسے واقعات سے بچنے کے لئے بسوں کی باقاعدہ جانچ جاری رکھی جائے گی۔
About the Author
