حیدرآباد: کانگریس کی تادیبی کمیٹی کے صدر اور رکن پارلیمنٹ ملو روی نے کہا ہے کہ منوگوڑ کے رکن اسمبلی کومٹی ریڈی راجگوپال ریڈی کی جانب سے چیف منسٹر ریونت ریڈی پر کیے گئے تبصروں کا پارٹی ہائی کمان جائزہ لے گی۔
پیر کے روز نئی دہلی میں صحافیوں سے بات کرتے ہوئے ملو روی نے پارٹی قائدین کو متنبہ کیا کہ وہ اندرونی معاملات کو عوامی سطح پر نہ لائیں۔ انہوں نے ریونت ریڈی کے حالیہ بیانات کے پس منظر میں تمام کانگریس ذمہ داروں سے صبر و تحمل سے کام لینے کی اپیل کی۔
ریونت ریڈی کے مبینہ دس سالہ مدت کار سے متعلق بیان پر کومٹی ریڈی راجگوپال کی تنقید کے جواب میں ملو روی نے کہا کہ ممکن ہے ریونت ریڈی کے بیان کا صحیح سیاق و سباق مکمل طور پر سمجھا نہ گیا ہو۔
انہوں نے واضح کیا کہ کانگریس ایک منظم پارٹی ہے اور اختلافات کو پارٹی فورمز پر ہی زیر بحث لانا چاہیے، میڈیا کے ذریعے نہیں۔ ملو روی نے کہا کہ پارٹی ہائی کمان اس معاملے پر غور کرے گی اور ضرورت پڑنے پر مناسب کارروائی کی جائے گی۔
About the Author
