Hyderabad: Telangana Anti-Corruption Bureau (ACB) ne Jagtial District Transport Officer (DTO) Banoth Bhadru Naik aur unke private driver Banoth Aravind ko ₹22,000 ki bribe lete waqt giraftar kar liya. ACB officials ke mutabiq, yeh rishwat complainant ke khilaf vehicle-related case file na karne aur uske mobile phones release karne ke badle maangi gayi thi.
Initial demand ₹40,000 ki thi, jise baad mein ₹35,000 tak negotiate kiya gaya. Complainant ne pehla payment ₹13,000 4 August ko diya tha, jabki remaining ₹22,000 jab diya gaya to ACB ne unhe rangey haath pakad liya.
ACB Telangana ne public se appeal ki hai ke agar kisi bhi public servant ki taraf se bribe ya illegal demand ki jaye to turant shikayat ki jaye. Log 1064 toll-free number par call karke, WhatsApp (9440446106) ke zariye ya official website acb.telangana.gov.in par complaint file kar sakte hain. Agency ne yeh bhi ashwasan diya ke complainants ki identity confidential rakhi jaayegi.
