حیدرآباد: تلنگانہ حکومت نے تعلیمی سال 2025–26 کے دوران ریاست بھر میں [en]Primary Schools[/en] کی دستیابی کو یقینی بنانے کے لیے 571 نئے پرائمری اسکول قائم کرنے کا فیصلہ کیا ہے۔ یہ اقدام اُن بستیوں اور علاقوں میں کیا جا رہا ہے جہاں فی الحال کوئی سرکاری اسکول موجود نہیں ہے۔
نئی رہنما خطوط کے مطابق 212 دیہی علاقوں اور 359 شہری کالونیوں یا وارڈز میں یہ اسکول قائم کیے جائیں گے۔ اسکول قائم کرنے کے لیے کم از کم 20 بچوں کی موجودگی لازمی قرار دی گئی ہے۔
اس کے ساتھ ساتھ حکومت نے تمام سرکاری پرائمری اسکولوں میں لوئر کنڈرگارٹن (ایل کے جی)، اپر کنڈرگارٹن (یو کے جی) اور پری پرائمری درجات کا آغاز بھی رواں تعلیمی سال سے کرنے کی منظوری دی ہے۔ دلچسپ بات یہ ہے کہ سرکاری اسکولوں کے نصاب میں مصنوعی ذہانت (آرٹیفیشل انٹیلیجنس) کو باضابطہ مضمون کے طور پر شامل کیا جا رہا ہے۔
چیف منسٹر اے ریونت ریڈی نے حال ہی میں محکمہ تعلیم کے منصوبوں کا جائزہ لیتے ہوئے ہدایت دی کہ بنیادی تعلیم تک ہر بچے کی رسائی کو یقینی بنایا جائے۔ ضلعی عہدیداروں کو ہدایت دی گئی ہے کہ وہ نئے اسکول موجودہ سرکاری عمارتوں یا بوقت ضرورت کرایہ کی عمارتوں میں قائم کریں۔ مالی امداد براہ راست ڈائریکٹر آف اسکول ایجوکیشن کے ذریعے فراہم کی جائے گی۔
یہ اقدام تعلیمی معیار کو بہتر بنانے اور محروم طبقات کے بچوں کو مساوی تعلیمی مواقع فراہم کرنے کی سمت اہم پیش رفت قرار دیا جا رہا ہے۔
