حیدرآباد:تلنگانہ پردیش کانگریس کمیٹی (ٹی پی سی سی) کی سیاسی امور اور مشاورتی کمیٹیاں ہفتہ کی شام گاندھی بھون میں مشترکہ اجلاس منعقد کریں گی تاکہ ریاست میں بلدی اور مقامی ادارہ جاتی انتخابات کے سلسلے میں Telangana Congress کی حکمت عملی پر غور کیا جا سکے۔
یہ اجلاس آل انڈیا کانگریس کمیٹی کی جنرل سکریٹری اور تلنگانہ انچارج میناکشی نٹراجن کی صدارت میں ہوگا۔ اجلاس میں وزیراعلیٰ اے ریونت ریڈی، ٹی پی سی سی صدر مہیش کمار گوڑ، ڈپٹی چیف منسٹر بھٹی وکرمارکا، کابینی وزرا اور دیگر سینئر رہنما شرکت کریں گے۔
ذرائع کے مطابق اجلاس کا بنیادی ایجنڈا آنے والے انتخابات کے لیے پارٹی کی حکمت عملی تیار کرنا ہے۔ ریاستی حکومت کا کہنا ہے کہ انتخابات صرف اس وقت ہوں گے جب پسماندہ طبقات (بی سی) کے لیے 42 فیصد ریزرویشن کو یقینی بنایا جائے۔ تاہم بی سی ریزرویشن بل ہنوز صدر جمہوریہ ہند کے پاس زیر التواء ہے اور اس سے متعلق آرڈیننس قانونی جانچ کے مرحلے میں ہے۔
ہائی کورٹ کی جانب سے 30 ستمبر تک انتخابات منعقد کرنے کی ڈیڈلائن کے پیش نظر حکومت پر فوری اقدام کرنے کا دباؤ ہے۔ پارٹی ذرائع کا کہنا ہے کہ ہفتہ کا یہ اجلاس کانگریس قیادت کے موقف کو حتمی شکل دینے میں مددگار ہوگا تاکہ 25 اگست کو طے شدہ کابینی اجلاس میں فیصلہ لیا جا سکے۔
About the Author
