حیدرآباد: تلنگانہ حکومت کے وہپ آدی سرینواس نے بی جے پی پر الزام عائد کیا ہے کہ وہ BC Reservationکے مسئلے پر دوہرا رویہ اختیار کر رہی ہے۔ جمعرات کو میڈیا سے بات کرتے ہوئے انہوں نے کہا کہ بی جے پی نے اگرچہ ریاستی اسمبلی میں 42 فیصد بی سی تحفظات کے بل کی حمایت کی، لیکن اب وہ اسے آئین کی نویں فہرست میں شامل کرنے سے مرکز میں رکاوٹ ڈال رہی ہے۔
آدی سرینواس نے مطالبہ کیا کہ مرکزی حکومت اپنے موقف کی وضاحت کرے اور اس بل کی راہ میں حائل رکاوٹیں ختم کرے تاکہ اسے آئینی تحفظ حاصل ہو سکے۔ ان کا کہنا تھا کہ بی جے پی مسلمانوں کے کوٹہ کو بنیاد بنا کر بی سی طبقات کے لیے تجویز کردہ تحفظات کو ناکام بنانے کی کوشش کر رہی ہے۔
ان کا کہنا تھا کہ بی جے پی کا بی سی طبقات کے تئیں کوئی اخلاص نہیں، نہ ہی اس کا موقف واضح ہے اور نہ ہی اس میں سنجیدگی ہے۔
مرکز پر روہنی کمیشن اور ذات پات مردم شماری میں رکاوٹ کا الزام
آدی سرینواس نے سوال اٹھایا کہ جسٹس روہنی کمیشن کی رپورٹ، جو او بی سی زمروں کی درجہ بندی سے متعلق ہے، 2017 میں پیش کی گئی تھی، لیکن آج تک اسے جاری کیوں نہیں کیا گیا؟ انہوں نے سپریم کورٹ میں مرکزی حکومت کی جانب سے ذات پات پر مبنی مردم شماری کی مخالفت پر بھی تنقید کی۔
ان کا کہنا تھا کہ تلنگانہ نے جو مردم شماری کی ہے، وہ مذہب پر نہیں بلکہ ذات پر مبنی ہے، اور اسے قومی ماڈل کے طور پر اپنانا چاہیے۔ آدی سرینواس نے واضح الفاظ میں کہا کہ بی جے پی مسلمانوں کو بہانہ بنا کر بی سی طبقات کے حق میں لائے جانے والے اقدامات کو روکنے کی کوشش کر رہی ہے۔
انہوں نے یہ بھی الزام لگایا کہ مرکزی حکومت نے ریاستی حکومت کی جانب سے بھیجی گئی صدارتی تقرری کی درخواست کو رد کر دیا اور سابق وزیر اعلیٰ کے چندر شیکھر راؤ کی جانب سے لائے گئے بی سی قانون میں ترمیم سے متعلق آرڈیننس کو بھی روک دیا گیا۔
آدی سرینواس نے بی جے پی سے مطالبہ کیا کہ وہ اپنی ہٹ دھرمی ترک کرے اور بی سی تحفظات کے بل کو آئینی تحفظ دینے میں تعاون کرے۔
About the Author
