حیدرآباد: بھارت راشٹرا سمیتی (بی آر ایس) نے مطالبہ کیا ہے کہ پارلیمنٹ میں Regional Partiesکو، چاہے ان کے ارکان کی تعداد کچھ بھی ہو، مناسب وقت دیا جائے تاکہ وہ ریاستی اور قومی سطح کے اہم مسائل کو اجاگر کر سکیں۔
پارلیمانی امور کے وزیر کرن رجیجو کی صدارت میں اتوار کو منعقدہ آل پارٹی اجلاس میں بی آر ایس کے راجیہ سبھا لیڈر کے آر سریش ریڈی نے یہ مطالبہ پیش کیا۔ اجلاس پیر سے شروع ہونے والے مانسون سیشن سے قبل منعقد ہوا۔
اجلاس کے بعد میڈیا سے بات کرتے ہوئے سریش ریڈی نے کہا کہ تلنگانہ سمیت ملک بھر کے عوامی مسائل پر بروقت اور معیاری بحث ہونا ضروری ہے۔ انہوں نے بی جے پی اور کانگریس دونوں سے اپیل کی کہ وہ کارروائی ملتوی کرنے کی سیاست سے گریز کریں تاکہ عوامی مسائل زیر بحث آ سکیں۔
انہوں نے بین ریاستی آبی تنازعات کا حوالہ دیتے ہوئے دریاؤں کو جوڑنے کی پالیسی پر جامع بحث کا مطالبہ کیا۔ ان کا کہنا تھا کہ بی آر ایس اصولاً دریاؤں کے انٹرلنکنگ کی مخالفت نہیں کرتی، لیکن وہ ایسے منصوبوں کی سخت مخالفت کرے گی جو پڑوسی ریاستوں کی طرف سے یکطرفہ طور پر تعمیر کیے جا رہے ہیں اور تلنگانہ کی آبی سلامتی کے لیے خطرہ بن سکتے ہیں۔
سریش ریڈی نے مزید کہا کہ ریاست میں کھادوں کی شدید قلت سے کسان پریشان ہیں اور مرکزی حکومت کو فوری اقدام کرنا چاہیے۔ انہوں نے یہ بھی مطالبہ کیا کہ پارلیمنٹ میں سابق امریکی صدر ڈونلڈ ٹرمپ کی ٹیرف پالیسی کے بھارتی زراعت پر اثرات کا جائزہ لیا جائے۔
بی آر ایس نے حلقہ بندیوں سے متعلق مرکزی حکومت کی مجوزہ پالیسی پر بھی بحث کا مطالبہ کیا اور کہا کہ اس پر دونوں ایوانوں میں واضح مؤقف پیش کیا جائے۔
About the Author
