حیدرآباد: تلنگانہ قانون ساز اسمبلی اور کونسل کے اجلاس آج (ہفتہ) صبح 10:30 بجے سے شروع ہوں گے۔ پہلے دن دونوں ایوانوں میں حال ہی میں وفات پانے والے ارکان پر تعزیتی قراردادیں منظور کی جائیں گی۔ Telangana Assemblyمیں جوبلی ہلز کے ایم ایل اے مانگٹنی گوپی ناتھ کے انتقال پر قرارداد پاس ہوگی جبکہ کونسل میں سابق ایم ایل سیز ڈاکٹر ٹی. رتناکر اور ایم. رنگاریڈی کو خراج عقیدت پیش کیا جائے گا۔ تعزیتی کارروائیوں کے بعد دونوں ایوان دن بھر کے لیے ملتوی ہو جائیں گے۔
حکومت کا ایجنڈا: کالیشورم رپورٹ
ذرائع کے مطابق حکومت نے ان اجلاسوں کو معمول کے مانسون اجلاس کی بجائے خصوصی اجلاس کے طور پر منعقد کرنے کا فیصلہ کیا ہے، جس کا محور جسٹس پی سی گھوش کمیشن کی کالیشورم پراجیکٹ رپورٹ ہوگی۔ رپورٹ پیر کو پیش کیے جانے کا امکان ہے جس پر 2 سے 3 دن بحث کے بعد اجلاس ختم ہوسکتا ہے۔ مجموعی مدت 3 سے 5 دن سے زیادہ نہیں ہوگی۔
ڈپٹی اسپیکر کا انتخاب
اس اجلاس میں ڈپٹی اسپیکر کا انتخاب بھی ہوگا۔ حکمراں کانگریس نے ڈورنکل ایم ایل اے رام چندر نائیک کو نامزد کیا ہے۔ اسپیکر نوٹیفکیشن جاری کر کے انتخابی عمل مکمل کریں گے۔
اپوزیشن کا دباؤ: عوامی مسائل پر بحث
اپوزیشن جماعتیں اصرار کر رہی ہیں کہ اجلاس میں صرف کالیشورم رپورٹ ہی نہیں بلکہ عوامی مسائل پر بھی بحث کی جائے۔ ان میں کسانوں کو درپیش یوریا کی شدید قلت، 15 اضلاع میں سیلاب کی تباہ کاریاں، فیس ری ایمبرسمنٹ میں تاخیر، اسپتالوں کا ناقص ڈھانچہ، شہروں و دیہات میں صفائی کے مسائل، گورکُل اسکولز میں طلبہ کی اموات اور روزگار کیلنڈر کی غیر موجودگی شامل ہیں۔ تاہم حکومت ان موضوعات کو نہ اٹھانے کے حق میں ہے جس پر تنقید ہو رہی ہے۔
کابینہ اجلاس
اجلاس کے دوران ریاستی کابینہ بھی اسمبلی کمیٹی ہال میں بیٹھک کرے گی جس میں تقریباً 20 تجاویز کو منظوری دی جائے گی۔ ان میں ایک اہم فیصلہ بلدی اداروں میں بی سیز کو 42 فیصد ریزرویشن دینے کا بھی شامل ہے، جس کا جی او جلد جاری ہوگا۔
اسمبلی اسپیکر گڈم پرساد کمار اور کونسل چیئرمین گتہ سکھندر ریڈی نے چیف سکریٹری رام کرشنا راؤ اور ڈی جی پی جیتندر کے ساتھ اجلاس کی تیاریاں اور سیکیورٹی انتظامات کا جائزہ لیا۔
