حیدرآباد: تلنگانہ کے وزیراعلیٰ ریونت ریڈی نے کہا ہے کہ صرف راہول گاندھی ہی وزیراعظم نریندر مودی کو اقتدار سے ہٹا سکتے (Unseat Modi)ہیں اور کانگریس کی زیر قیادت حکومت ملک بھر میں ذات پر مبنی مردم شماری کرائے گی تاکہ “نئے سماجی انصاف” کو یقینی بنایا جا سکے۔
نئی دہلی میں آل انڈیا کانگریس کمیٹی کی لیگل سیل کے پروگرام سے خطاب کرتے ہوئے ریونت نے کہا کہ کانگریس نے ملک کی آزادی کے لیے جدوجہد کی، جب کہ بی جے پی سوال کرتی ہے کہ کانگریس نے کیا کیا۔ “ہم نے انگریزوں سے لڑائی لڑی، اقتدار کے انتظار میں نہیں بیٹھے تھے،” انہوں نے کہا۔
ریونت نے وزیراعظم مودی پر الزام لگایا کہ وہ مسلسل 26 سال سے اقتدار سے چمٹے ہوئے ہیں اور راشٹریہ سویم سیوک سنگھ (آر ایس ایس) اور بی جے پی کے رہنماؤں کی بارہا کوششوں کے باوجود منصب چھوڑنے کو تیار نہیں۔ انہوں نے کہا کہ موہن بھاگوت نے حال ہی میں کہا تھا کہ کسی کو 75 سال کی عمر کے بعد عہدہ نہیں سنبھالنا چاہیے، مگر مودی کرسی نہیں چھوڑتے۔
انہوں نے گاندھی خاندان کو ملک کا واحد سیاسی خاندان قرار دیا جو بار بار اقتدار کی قربانی دیتا رہا ہے۔ “اندرا گاندھی نے پاکستان کو دو ٹکڑوں میں بانٹا، راجیو گاندھی دہشتگردی کے خلاف شہید ہوئے، سونیا گاندھی نے وزیراعظم کا عہدہ ٹھکرا دیا، منموہن سنگھ قوم کے لیے وزیراعظم بنے، اور راہول گاندھی کو کئی بار موقع ملا مگر وہ کارکن کی طرح کام کرتے رہے،” ریونت نے کہا۔
ریونت نے بی جے پی کے رکن پارلیمنٹ نشی کانت دوبے کے بیان کا حوالہ دیتے ہوئے کہا کہ بی جے پی نریندر مودی کے بغیر 150 سیٹیں بھی نہیں جیت سکتی۔ “ہم تیار ہیں کہ وہ ایک سیٹ بھی نہ جیت سکیں،” انہوں نے کہا۔
ریونت نے کہا کہ تلنگانہ کانگریس نے ذات پر مبنی مردم شماری کے ذریعے ملک کے لیے سماجی انصاف کا نیا راستہ دکھایا ہے۔ انہوں نے کہا کہ راہول گاندھی نے بھارت جوڑو یاترا کے دوران یہ مسئلہ اٹھایا تھا اور اب کانگریس اسے ملک گیر مہم میں تبدیل کرے گی۔
About the Author
