Hyderabad: Telangana mein baldi intikhabat ka schedule jaari hone ke sath hi poore riyasat mein intikhabi zabita laagu ho gaya hai. Lekin Greater Hyderabad Municipal Corporation (GHMC) ke ilaqe is se mustasna hain. Zabita intikhabi amal ke ikhtitam tak barqarar rahega aur Poll Cash Limit bhi laagu ho chuki hai.
Police aur Enforcement wings ne riyasat bhar mein talashi muhim shuru kar di hai. Afseran ne hidayat di hai ke log agar cash, zevarat ya qeemti ashya le ja rahe hain to unke paas durust receipt honi chahiye. Election Commission ke qawaneen ke mutabiq, kisi shakhs ke paas 50,000 rupaye se zyada cash paaye jaane par usse documents dikhane honge, warna rakam zabt kar li jaayegi.
Intizamia ka kehna hai ke agar badi rakam baramad hoti hai to Income Tax aur GST departments ko ittila di jaayegi, jabke choti rashi Revenue department ke hawale ki jaayegi. Afsaran ne awaam aur unke numaindon se appeal ki hai ke wo intikhabi qawaneen ki sakhti se pabandi karein.
Zaroori kharchon ke liye wazahat
Afsaran ne wazahat ki hai ke agar cash ilaaj, college fees, tijarati len-den ya shadi ke kharch ke liye ho, to uska saboot paish karna hoga. Public ko mashwara diya gaya hai ke bank se nikaali gayi cash par passbook ya ATM parchi saath rakhein. Tijarat karne walon se kaha gaya hai ke wo saman ya anaaj ke sale bills sambhaal kar rakhein, aur property transaction ke liye zameen ke dastawaiz dikhana zaroori hai. Agar saboot durust paish kiya gaya to zabt ki gayi rakam wapas kar di jaayegi.
