حیدرآباد ۔ تلنگانہ حکومت 26 یا 27 ستمبر کو مقامی ادارہ انتخابات کا شیڈول جاری کرنے والی ہے جو دسہرہ تہوار سے قبل متوقع ہے۔ حکام نے تصدیق کی کہ تہوار کے بعد کسی بھی وقت Local Body Polls کے ضمن میں باضابطہ نوٹیفکیشن جاری کیا جا سکتا ہے کیونکہ انتخابی تیاریاں تیزی سے جاری ہیں۔
ریاستی حکومت الیکشن کمیشن کو اپنی تیاریوں سے آگاہ کرنے والی ہے۔ اس سلسلے میں آج یا کل ایک باضابطہ مکتوب بھیجا جائے گا جس کے ساتھ ریزرویشن کی حتمی تفصیلات بھی شامل ہوں گی۔
بی سی ریزرویشن پر نیا جی او
ذرائع کے مطابق حکومت کی جانب سے ایک نیا سرکاری حکمنامہ جاری کیا جا رہا ہے جس میں مقامی اداروں میں پسماندہ طبقات کے لیے 42 فیصد ریزرویشن فراہم کیا جائے گا۔ اگرچہ اسی نوعیت کا ایک بل صدر جمہوریہ کے پاس منظوری کے لیے زیر التواء ہے، تاہم ریاست نے آگے بڑھنے کا فیصلہ کیا ہے۔ قانون اور ویلفیئر محکموں کے سکریٹریز نے مسودے کا جائزہ لے لیا ہے اور اب چیف منسٹر کے دفتر سے منظوری باقی ہے۔
حکام کا ماننا ہے کہ انتخابی عمل جلد شروع کرنے سے عدالتی مداخلت کے امکانات کم ہوں گے۔ اسی لیے حکومت 26 ستمبر سے قبل شیڈول جاری کر کے ہائی کورٹ کو یہ دکھانا چاہتی ہے کہ اس نے 30 ستمبر تک انتخابات مکمل کرنے کی ہدایت پر عمل کیا ہے۔
پولنگ عملے کی تربیت
Local Body Polls کے پرامن انعقاد کے لیے الیکشن کمیشن نے تمام ضلع کلکٹرس کو ہدایت دی ہے کہ وہ پولنگ افسران کی تقرری کریں۔ ان افسران کی تربیت کے لیے ڈویژن وار اجلاس 26 اور 27 ستمبر کو منعقد کیے جائیں گے۔
About the Author
