حیدرآباد : تلنگانہ کے رہائشی گروکل اداروں میں طلبہ کی خودکشی کے واقعات میں تشویشناک اضافہ جاری ہے۔ تازہ ترین واقعہ آرمور ٹاؤن میں پیش آیا، جہاں ایک 17 سالہ انٹرمیڈیٹ طالبعلم نے ہفتہ کی صبح خودکشی کر لی۔
متوفی کی شناخت گڈّم سنتوش کے طور پر ہوئی ہے، جو ضلع کاماریڈی کے نظام ساگر منڈل کے آری پلی گاؤں سے تعلق رکھتا تھا اور آرمور گروکل کالج میں زیر تعلیم تھا۔
ہاسٹل میں رہنے والے ساتھی طلبہ کے مطابق سنتوش نے حسب معمول صبح اٹھ کر ساتھیوں سے بات چیت کی اور روزمرہ کاموں سے فارغ ہوکر باہر گیا۔ کچھ ہی دیر بعد کالج کے قریب ایک درخت سے اس کی لاش لٹکی ہوئی ملی۔
یہ واقعہ گذشتہ چار دنوں میں تلنگانہ کے گروکل اداروں میں رپورٹ ہونے والی پانچویں طالبعلم کی خودکشی ہے، جب کہ سال 2025 میں اب تک ایسے آٹھ افسوسناک واقعات پیش آ چکے ہیں۔
پولیس نے واقعہ کی تحقیقات شروع کر دی ہے تاہم اب تک وجوہات کی مکمل تصدیق نہیں ہو سکی۔ مزید تفصیلات کا انتظار ہے۔
