حیدرآباد: پسماندہ طبقات (بی سی) کے لیے اسمبلی اور پارلیمنٹ میں 50 فیصد ریزرویشن [en]BC Reservation[/en] کے مطالبے اور مرکز میں علیحدہ وزارت برائے بی سی ویلفیئر کے قیام کے لیے بی سی تنظیمیں 23 اور 24 جون کو دہلی میں ملک گیر احتجاج منعقد کریں گی۔ اس بات کا اعلان نیشنل بی سی ویلفیئر ایسوسی ایشن کے صدر آر. کرشنیّا نے کیا۔
بی سی ریزرویشن سے متعلق بدھ کو بشیر باغ میں منعقدہ تلگو ریاستوں کی بی سی ویلفیئر ایسوسی ایشنز کے اجلاس سے خطاب کرتے ہوئے کرشنیّا نے کہا کہ اس ’چلو دہلی‘ احتجاج میں تلنگانہ، آندھرا پردیش، کرناٹک اور اوڈیشہ سے بڑی تعداد میں نمائندے شریک ہوں گے۔
اجلاس کی صدارت آندھرا پردیش بی سی ویلفیئر ایسوسی ایشن کے صدر بونو درگا نریش نے کی۔ مقررین نے کہا کہ بی سی طبقات کی سیاسی نمائندگی کو مضبوط بنانے کے لیے فوری قانون سازی کی ضرورت ہے۔ انہوں نے مطالبہ کیا کہ جمعرات کو منعقد ہونے والے تلنگانہ کابینہ کے اجلاس میں بلدیاتی انتخابات میں بی سی طبقات کو 42 فیصد ریزرویشن کی ضمانت دینے کے لیے خصوصی سرکاری احکامات جاری کیے جائیں۔
اس موقع پر دہلی احتجاج کے لیے تیار کردہ وال پوسٹرس کی رسم رونمائی بھی انجام دی گئی۔ اجلاس میں ایسوسی ایشن کے کنوینر گجا کرشنا، بی سی یوتھ ایسوسی ایشن کے ریاستی صدر جلی پلی انجی، بی سی اسٹوڈنٹ ایسوسی ایشن کے ریاستی سیکریٹریز رام دیو مودی یادو اور پگیلا ستیش، نیز آندھرا کے دیگر بی سی قائدین شرد، وکرم، پی پربھو اور ایس ستیش بھی شریک تھے۔
