حیدرآباد: ساؤتھ زون ڈپٹی کمشنر آف پولیس اسنیہا مہرا آئی پی ایس نے جمعہ کے روز سنجری فنکشن ہال (میرچوک پولیس اسٹیشن حدود) میں امن کمیٹی اجلاس کی صدارت کی تاکہ آنے والے Ganesh festivalاور میلادالنبیؐ کے سلسلے میں تیاریوں کا جائزہ لیا جا سکے۔
اس اجلاس میں ساؤتھ زون کے ایڈیشنل ڈپٹی کمشنر پولیس مجید، سنٹرل پیس کمیٹی کے اراکین حفیظ مظفر اور خواجہ عبدالمعیز، اے سی پیز پی چندرشیکھر (چارمینار)، ایم اے جاوید (فلک نما)، شیام سندر (میرچوک) اور چندرشیکھر (چھتری ناکہ) شریک ہوئے۔ ساؤتھ زون کے پولیس اسٹیشنوں کے ایس ایچ اوز اور مقامی امن کمیٹی ممبران بھی موجود تھے۔
اپنے خطاب میں ڈی سی پی اسنیہا مہرا نے کہا کہ ایک دوسرے کے احترام، سمجھ بوجھ اور تعاون سے ہی پُرامن معاشرہ قائم کیا جا سکتا ہے۔ انہوں نے کمیٹی اراکین پر زور دیا کہ کسی بھی مشکوک سرگرمی کی فوری اطلاع پولیس کو دیں۔ ان کا کہنا تھا کہ محکمہ پولیس نظم و نسق قائم رکھنے کے لیے پوری طرح پرعزم ہے۔
ڈی سی پی نے خبردار کیا کہ سوشیل میڈیا پر اشتعال انگیز یا اشتباہی مواد کو پھیلانے یا فارورڈ کرنے سے گریز کیا جائے۔ انہوں نے کہا کہ عوام کو فرقہ وارانہ پروپیگنڈہ اور گمراہ کن معلومات سے ہوشیار رہنا ہوگا اور تہواروں کے دوران محفوظ ماحول کے لیے پولیس کے ساتھ مل کر کام کرنا چاہیے۔
عہدیداروں نے بتایا کہ اس طرح کے اجلاس کا مقصد کمیونٹی لیڈروں سے ہم آہنگی کو مزید مضبوط بنانا ہے تاکہ بڑے مذہبی پروگرام پرامن طور پر منعقد کیے جا سکیں۔ پولیس نے کہا کہ مشترکہ اقدامات سے باہمی اعتماد بڑھے گا اور سبھی برادریوں کے لیے سلامتی یقینی بنائی جا سکے گی۔
About the Author
