حیدرآباد: تلنگانہ کے وزیر اعلیٰ ریونت ریڈی نے جمعرات کو دہلی میں مرکزی وزیر برائے ریلوے و اطلاعات ٹیکنالوجی اشونی ویشنو سے ملاقات کی اور ریاست کے اہم ریلوے منصوبوں Telangana Railway Projectsاور زیر التوا آئی ٹی تجاویز کی فوری منظوری کا مطالبہ کیا۔ اس موقع پر وزراء اُتم کمار ریڈی اور سری دھر بابو بھی ان کے ہمراہ تھے۔
اس ملاقات کے دوران ریونت ریڈی نے خاص طور پر حیدرآباد کے اطراف علاقائی رنگ ریلوے نظام کے قیام پر زور دیا اور اس منصوبے کو آگے بڑھانے کے لیے مرکزی تعاون کی درخواست کی۔
قبل ازیں وزیر اعلیٰ نے آندھرا پردیش کے وزیر اعلیٰ این چندرابابو نائیڈو کے ساتھ مرکزی وزیر جل شکتی سی آر پاٹل سے ملاقات کی تھی، جس میں دونوں ریاستوں کے درمیان حل طلب آبی تنازعات پر تبادلہ خیال ہوا۔
ریونت ریڈی کی آج مزید مرکزی وزراء سے ملاقات متوقع ہے۔ ان کا دہلی دورہ اس وقت سیاسی اہمیت اختیار کر گیا ہے جب کہ تلنگانہ میں پسماندہ طبقات کے لیے تحفظات کے مسئلے پر بحث زور پکڑ رہی ہے۔
