حیدرآباد: تلنگانہ کے وزیر صنعت ڈی. سرِیدھر بابو نے بدھ کے روز ریاست میں صنعتی ترقی اور Youth Jobsکی فراہمی کو حکومت کا بنیادی مقصد قرار دیا۔
ڈاکٹر بی آر امبیڈکر تلنگانہ اسٹیٹ سکریٹریٹ میں منعقدہ اجلاس میں انہوں نے کنفیڈریشن آف انڈین انڈسٹری (CII)، فِکی (FICCI)، ایف ٹی سی سی آئی، اے ایل آئی پی، ٹی آئی ایف، ٹی او پی ایم اے اور ٹی ایس ٹی ایم اے جیسے صنعتی اداروں کے نمائندوں سے خطاب کیا۔ انہوں نے کہا کہ حکومت صنعت کاروں کو ہر ممکن سہولت فراہم کرے گی اور انہیں ریاست کی ترقی میں فعال شراکت دار بنائے گی۔
انہوں نے کہا کہ مائیکرو، اسمال اینڈ میڈیم انٹرپرائزز (MSME) معیشت کی ریڑھ کی ہڈی ہیں، اور حکومت ان کی مکمل حمایت کرے گی۔ “ہم صنعتوں پر ریگولیٹری بوجھ نہیں ڈالیں گے بلکہ ان کا تحفظ اور فروغ ہماری ترجیح ہے۔”
ڈی. سرِیدھر بابو نے بتایا کہ ریونت ریڈی کی قیادت والی حکومت سابقہ حکومتوں سے مختلف ہے اور وہ سب کی رائے لے کر شفاف طریقے سے فیصلے کر رہی ہے۔ انہوں نے بی آر ایس اور بی جے پی کے ان دعوؤں کو مسترد کیا کہ صنعتیں تلنگانہ سے باہر جا رہی ہیں، اور ان الزامات کو سیاسی افواہیں قرار دیا۔
انہوں نے کہا کہ گزشتہ 18 مہینوں میں ریاست نے 3 لاکھ کروڑ روپئے سے زائد کی سرمایہ کاری حاصل کی اور 1 لاکھ سے زیادہ نجی شعبے کی نوکریاں فراہم کی گئیں۔
وزیر موصوف نے صنعت کاروں سے تجاویز طلب کیں اور متعلقہ عہدیداروں کو ہدایت دی کہ صنعتوں سے متعلق زیر التوا مسائل کو فوری حل کیا جائے۔
اس اجلاس میں بی. جنک پرساد، سنجے کمار، دانا کشور، نکھیل چکرورتی جیسے اعلیٰ حکام کے علاوہ صنعتی نمائندے سمیع الدین، راجی وینکٹ رمن، شیکھر ریڈی، رامادیوی، سدھیر ریڈی اور دیگر موجود تھے۔
