حیدرآباد: چیف منسٹر ریونت ریڈی کو جمعہ کے روز تلنگانہ ہائی کورٹ سے بڑی قانونی راحت ملی، جب عدالت نے ان کے خلاف درج فوجداری مقدمہ Revanth Reddy Caseکو خارج کر دیا۔ یہ مقدمہ بی جے پی کے ایک لیڈر کی شکایت پر درج کیا گیا تھا۔
بی جے پی لیڈر کسم وینکٹیشورلو نے ریونت ریڈی پر الزام عائد کیا تھا کہ انہوں نے 4 مئی 2023 کو کھمم ضلع کے کوتہ گڈم میں ایک جلسہ عام کے دوران بی جے پی پر ریزرویشن ختم کرنے کا ارادہ رکھنے کا الزام لگایا، جس سے پارٹی کی ساکھ کو نقصان پہنچا۔
اس شکایت کی بنیاد پر عوامی نمائندوں کے لیے قائم خصوصی عدالت میں مقدمہ زیرِ سماعت تھا۔ ریونت ریڈی نے ہائی کورٹ سے رجوع کرتے ہوئے اس مقدمہ کو کالعدم قرار دینے کی درخواست کی، جسے عدالت نے منظور کر لیا۔
اس سے قبل اسی ہفتے ریونت ریڈی کو سپریم کورٹ سے بھی راحت ملی تھی، جہاں گوپن پلی میں نجی اراضی تنازعہ سے متعلق ایک عرضی کو چیف جسٹس کی بنچ نے مسترد کر دیا تھا۔ مذکورہ عرضی این۔ پیدی راجو کی جانب سے دائر کی گئی تھی۔
ریونت ریڈی کے لیے حالیہ عدالتی فیصلے سیاسی اور قانونی سطح پر اہم کامیابیاں سمجھی جا رہی ہیں۔
