حیدرآباد: آل انڈیا مجلس اتحاد المسلمین کے صدر اور رکن پارلیمان اسد الدین اویسی نے پیر کے روز ڈپٹی چیف منسٹر و وزیر برقی ملو بھٹی وکرمارکا سے ملاقات کرتے ہوئے شہر میں حالیہ Internet outagesپر فوری کارروائی کا مطالبہ کیا۔ اس موقع پر ملک پیٹ کے رکن اسمبلی احمد بن عبداللہ بلعلہ بھی موجود تھے۔
اسدالدین اویسی نے کہا کہ انٹرنیٹ میں رکاوٹیں طلبہ، پیشہ ور افراد اور کاروباری طبقہ کے لیے شدید مشکلات پیدا کر رہی ہیں۔ انہوں نے زور دے کر کہا کہ حیدرآباد جیسے بڑے ٹیکنالوجی مرکز میں انٹرنیٹ خدمات کی بحالی کو اولین ترجیح دی جانی چاہیے۔
انہوں نے ڈپٹی چیف منسٹر سے اپیل کی کہ تمام متعلقہ محکموں اور ٹیلی کام کمپنیوں کے ساتھ ہم آہنگی پیدا کریں تاکہ مسئلہ کی فوری نشاندہی اور ازالہ ممکن ہو سکے اور عوام کو مزید مشکلات کا سامنا نہ کرنا پڑے۔
ڈپٹی چیف منسٹر بھٹی وکرمارکا نے ایم آئی ایم کے وفد کو یقین دلایا کہ ریاستی حکومت بغیر تاخیر کے کارروائی کرے گی۔ انہوں نے کہا کہ مستحکم انٹرنیٹ کنیکٹیویٹی خاص طور پر حیدرآباد میں نہایت اہم ہے جہاں لاکھوں شہری تعلیم، آن لائن کام اور بنیادی سہولتوں کے لیے اس پر انحصار کرتے ہیں۔
اس دوران شہر کے کئی علاقوں میں گزشتہ دنوں انٹرنیٹ کی بار بار بندش کی شکایات سامنے آئیں۔ متاثرہ شہریوں نے سوشیل میڈیا پر اپنی ناراضگی ظاہر کرتے ہوئے بتایا کہ اس مسئلہ نے آن لائن کلاسوں، گھر سے کام کرنے کے نظام اور ڈیجیٹل ادائیگیوں کو متاثر کیا ہے۔ چھوٹے کاروباری حضرات اور آئی ٹی اداروں نے بھی مالی نقصانات کی شکایت کی۔
ایم آئی ایم کی اپیل کے بعد حکومت کے مداخلت کرنے سے عوام کو امید ہے کہ انٹرنیٹ خدمات جلد معمول پر آجائیں گی۔
