حیدرآباد: ملک گیر سطح پر سامنے آنے والے فالکن انوائس ڈسکاؤنٹنگ اسکیم معاملے میں بڑی پیش رفت کے طور پر ممبئی پولیس نے مرکزی ملزم اور فالکن گروپ کے منیجنگ ڈائریکٹر امر دیپ کمار کو گرفتار کر لیا ہے۔ پولیس کے مطابق وہ خلیجی ملک سے ممبئی ہوائی اڈے پر اترتے ہی حراست میں لے لیا گیا۔
پولیس نے بتایا کہ امیگریشن حکام نے امر دیپ کمار کی شناخت کرتے ہوئے فوری طور پر مقامی پولیس کو اطلاع دی، جس کے بعد اسے ہوائی اڈے سے گرفتار کیا گیا۔ اسکیم منظر عام پر آنے کے بعد وہ کئی مہینوں سے بیرون ملک مقیم تھا۔
فالکن اسکیم کس طرح چلائی گئی | Falcon Scam
تفتیشی حکام کے مطابق امر دیپ کمار نے حیدرآباد کے ہائی ٹیک سٹی میں کیپیٹل پروٹیکشن فورس پرائیویٹ لمیٹڈ قائم کی اور فالکن برانڈ کے نام سے ایک موبائل ایپ لانچ کی۔ اس ایپ کے ذریعے سرمایہ کاروں کو معروف ملٹی نیشنل کمپنیوں سے منسلک انوائس ڈسکاؤنٹنگ کا جھانسہ دیا گیا۔
پولیس کا کہنا ہے کہ ملزم نے سرمایہ کاروں کو 11 سے 22 فیصد سالانہ منافع کا وعدہ کیا۔ ان دعوؤں کے ذریعے گروپ نے تقریباً 1,700 کروڑ روپئے جمع کیے۔ ابتدائی طور پر تقریباً 850 کروڑ روپئے واپس کیے گئے، تاہم باقی رقم مبینہ طور پر خرد برد کر لی گئی، جس کے بعد 7,000 سے زائد سرمایہ کاروں نے نقصان کی شکایات درج کرائیں۔
بیرون ملک فرار، اثاثے ضبط | Falcon Scam
تحقیقات کے مطابق احتجاج شدت اختیار کرنے سے پہلے امر دیپ کمار ایک نجی جیٹ کے ذریعے دبئی فرار ہو گیا تھا۔ بعد ازاں انفورسمنٹ ڈائریکٹوریٹ نے 18 کروڑ روپئے مالیت کے اثاثے ضبط کیے، جن میں ہاکر 800 اے نجی طیارہ اور کئی لگژری گاڑیاں شامل ہیں۔
حکام نے بتایا کہ دھوکہ دہی سے حاصل کی گئی رقم کو کرپٹو کرنسی، جائیداد اور بیرون ملک شیل کمپنیوں میں منتقل کیا گیا۔ اس دوران کمپنی کے سی ای او اور امر دیپ کمار کے بھائی سندیپ کمار سمیت دیگر اہم ملزمان کو پہلے ہی گرفتار کیا جا چکا ہے۔
پولیس کے مطابق امر دیپ کمار کے خلاف پہلے سے لُک آؤٹ نوٹس جاری تھا، جس کی بنیاد پر اسے ہوائی اڈے پر پکڑا گیا۔ اب ممبئی پولیس اسے ٹرانزٹ ریمانڈ پر حیدرآباد منتقل کرنے کی تیاری کر رہی ہے۔ تفتیش کاروں کا کہنا ہے کہ مزید پوچھ گچھ سے بیرون ملک رقوم کی منتقلی اور دیگر شیل کمپنیوں سے متعلق اہم انکشافات متوقع ہیں۔
About the Author
