حیدرآباد: BRSکے ریاستی قائد اور سابق آئی پی ایس افسر آر ایس پروین کمار نے سابق اچم پیٹ ایم ایل اے گووّلا بال راجو سے اپیل کی ہے کہ وہ پارٹی چھوڑنے کے فیصلے پر دوبارہ غور کریں۔ انہوں نے بال راجو کے استعفے کو افسوسناک قرار دیا اور کہا کہ یہ قدم موجودہ سیاسی صورتحال میں مناسب نہیں ہے۔
اپنے ایک سوشل میڈیا پیغام میں پروین کمار نے تسلیم کیا کہ استعفیٰ ذاتی فیصلہ ہو سکتا ہے، لیکن انہوں نے خبردار کیا کہ بال راجو کو کانگریس-بی جے پی اتحاد کے جھوٹے پروپیگنڈے کا شکار نہیں ہونا چاہیے۔
انہوں نے کہا کہ تلنگانہ اس وقت ایک نازک مرحلے سے گزر رہا ہے، جہاں عوام کانگریس کی پالیسیوں سے مایوس ہو چکے ہیں اور کے سی آر کی قیادت کی واپسی کی امید لگائے بیٹھے ہیں۔ ایسے وقت میں بال راجو کو اپنے حلقے کے عوام کی آواز بننا چاہیے تھا اور سیاسی تنزلی کے خلاف مزاحمت کو مضبوط کرنا چاہیے تھا۔
پروین کمار نے کہا کہ اچم پیٹ کے عوام کو بال راجو کے فیصلے سے مایوس نہیں ہونا چاہیے۔ بی آر ایس ایسی طاقت ہے جو استحصالی، فرقہ پرست اور جاگیردارانہ قوتوں کے خلاف فرنٹ لائن میں کھڑی ہے، اور ریاست کے مفادات کی حفاظت کے لیے اس کے کارکنان وقف ہیں۔
انہوں نے زور دے کر کہا کہ بی آر ایس ہی وہ واحد جماعت ہے جو شہداء تلنگانہ کے خوابوں کی تکمیل کے لیے پُرعزم ہے، اور کے سی آر دوبارہ ریاست کے وزیر اعلیٰ بنیں گے۔
About the Author
