Hyderabad: Chevella ke jangalat mein ek ajeeb o ghareeb Money Rain scam ke zariye ek shehri se ₹21 lakh rupay loot liye gaye. 7 afraad par mushtamil is gang ne jadui rasm ke naam par gundi plan tayar ki, jisme ab tak 5 log giraftar ho chuke hain jabke 2 ab bhi farar hain. Police ne Monday ko is fraud ki tafseelat media se share ki.
Yeh waqi’a 25 July ko hua jab shikar ko pehle ek fake demo dikha kar 18 July ko Adilabad mein uska bharosa hasil kiya gaya. Phir usay Chevella mandal ke Modimiyala forest area mein le jaya gaya. Wahan milzimeen ne daawa kiya ke wo ek khaas rasm se “paise ki barish” karwa sakte hain aur iske liye asli cash ki zarurat hogi.
Rasm ke dauran sab ke mobile phones band karwa diye gaye, aur zarda, haldi, nimbu aur agarbatti ka istamal karte hue ek drama khada kiya gaya. Isi beech milzimeen gaadi tabdeel kar ke asli rakam ke sath farar ho gaye.
Police ne Maharashtra ke Sudheshwar Dutt Wankhade (A1), Prakash Marotrao Madhavi (A2), Adilabad ke Singare Dharmender (A3), Peddapalli ke Molukantla Sanjeev Kumar (A4) aur Mancherial ke Komandla Srinivas (A5) ko giraftar kiya. Baqi 2 milzimeen — Deulof Shinde (A6) aur Prashant Patil (A7) — ki talaash jaari hai.
Tahqiqat ke dauran police ne ₹18 lakh cash, 1 gram sona, aur kaafi taadaad mein fake currency bundles baramad kiye hain jin par “Children Bank of India”, “Manoranjan Bank” aur “RBI” jaise alfaz chhapay gaye the. Police ke mutabiq yeh gang pehle fake demo dikha kar bharosa hasil karta hai aur phir asli cash ko nakli noton se tabdeel kar deta hai.
Chevella Sub-Inspector Santosh Reddy ne awaam ko mutanabbeh kiya ke kisi bhi tarah ke jadui ya ghair-sainsi daawon par yaqeen na karein aur aise waqeaat ki foran police ko ittila dein.
About the Author
