Hyderabad: Abdullapurmet police ne peer ki shaam Saddduguda Cross Road par gaadiyon ki checking ke dauran illegal gelatin sticks ki ek bari kheap pakar kar 3 afraad ko giraftar kar liya. Yeh operation us waqt anjaam diya gaya jab ek KIA Sonet car (TS 05 FM 7070) ko shak ki buniyad par roka gaya.
Police ke mutabiq gaadi Ghatkesar se Abdullapurmet ki taraf ja rahi thi. Talashi ke dauran officers ko ek bag mein 198 gelatin sticks milein jo kisi bhi official ijazat ke baghair transport ki ja rahi thi.
Giraftar hone walon mein Shadnagar ka Konidela Saidulu, aur Abdullapurmet area se Alakuntla Venkatesh aur Chandrasekhar shamil hain. Police ne unki car ke sath sath teen mobile phones bhi zabt kar liye hain.
Tahqiqat ke dauran mulziman ne iqraar kiya ke unhone yeh dhamaka khez material Chettyal ke Naveen naam ke shakhs se hasil kiya tha. Abdullapurmet Inspector ke mutabiq mukadma darj kar liya gaya hai aur mazeed tahqiqat jaari hai.
