حیدرآباد: Kamareddyضلع میں بڑے پیمانے پر ریسکیو آپریشن کے دوران چار افراد اور 656 بھیڑوں کو کامیابی کے ساتھ بچا لیا گیا جو بیچکنڈہ منڈل کے شیٹلور گاؤں میں ایک دریا کے جزیرہ نما پر پھنس گئے تھے۔ کؤلس نالہ پراجیکٹ سے اچانک پانی کے بہاؤ میں اضافہ ہوا جس کے باعث منجیرہ دریا کی ایک شاخ میں پانی کی سطح بڑھ گئی اور ایمرجنسی پیدا ہوگئی۔
کاماریڈی کلکٹر آشیش سانگوان نے فوری طور پر ریسکیو ٹیموں کو تعینات کرنے کا حکم دیا۔ پھنسے ہوئے افراد میں شیٹلور کا ایک کسان، گنڈے کلور کے دو چرواہے اور بوساپور کا ایک چرواہا شامل تھے جو اپنے مویشیوں کے ساتھ محصور ہوگئے تھے۔
آٹھ گھنٹے طویل آپریشن
سب سے پہلے مدنور سے فائربریگیڈ کے جوان موقع پر پہنچے، اس کے بعد 14 رکنی ایس ڈی آر ایف ٹیم دو کشتیوں کے ساتھ پہنچی۔ ساتھ ہی ساتویں بٹالین کی 24 رکنی ٹیم آر ایس آئی کے وینوڈ کمار کی قیادت میں شامل ہوئی۔ کاماریڈی سے چار فائرفیسرز اور بانسواڑہ، بیچ کنڈہ و مقامی پولیس کے 20 اہلکار بھی اس مشن میں شامل رہے۔
بانسواڑہ سب کلکٹر کرن مئی اور 18 رکنی ریونیو ٹیم نے کارروائی کی نگرانی کی جبکہ کاماریڈی فائرفیسر ایس سندنا اور نظام آباد فائرفیسر ٹی پرمیشور نے آپریشن کی قیادت کی۔
ریسکیو عملہ نے پہلے تین چرواہوں کو محفوظ مقام پر منتقل کیا، اس کے بعد الگ تھلگ جزیرہ پر پھنسے کسان کو نکالا گیا۔ دشوار گزار حالات کے باوجود ٹیموں نے آٹھ گھنٹے طویل آپریشن جاری رکھا اور آخرکار تمام چار افراد اور 656 بھیڑوں کو بحفاظت بچا لیا۔
عہدیداروں نے اسے ایس ڈی آر ایف کی حالیہ برسوں کی سب سے بڑی کامیاب ریسکیو کارروائی قرار دیا اور کہا کہ مختلف محکموں اور مقامی دیہاتیوں کے بہترین تعاون سے یہ ممکن ہوسکا۔
عوام کے لئے انتباہ
جوکل کے رکن اسمبلی توٹا لکشمی کانت راؤ اور دیگر عوامی نمائندے بھی کارروائی کے دوران موجود رہے اور اس بات کو یقینی بنایا کہ کوئی جان ضائع نہ ہو۔
کلکٹر آشیش سانگوان نے ٹیموں کی تیز رفتار اور مشترکہ کارروائی کی ستائش کی۔ انہوں نے عوام کو مشورہ دیا کہ بارشوں کے دوران چوکس رہیں، پانی سے لبریز آبی ذخائر میں ماہی گیری سے پرہیز کریں اور نچلے پلوں اور نالوں کو عبور کرنے سے گریز کریں۔ اس کے علاوہ مویشیوں کو خطرناک مقامات سے دور رکھنے اور بچوں کو پانی کے قریب کھیلنے سے روکنے کی ہدایت دی۔
ایمرجنسی کی صورت میں شہری ٹول فری نمبر 08468-220069 پر رابطہ کر سکتے ہیں۔
About the Author
