حیدرآباد: مرکزی حکومت نے آندھرا پردیش اور تلنگانہ میں 8 ممکنہ River Linking منصوبوں کی نشاندہی کی ہے، یہ بات مرکزی وزیر مملکت برائے جل شکتی راج بھوشن چودھری نے جمعرات کو لوک سبھا میں بتائی۔ انہوں نے یہ جواب رکن پارلیمنٹ کوشلندر کمار کے سوال پر دیا اور ملک بھر میں دریا جوڑنے کی موجودہ پیش رفت پر روشنی ڈالی۔
راج بھوشن چودھری نے کہا کہ کرشنا، گوداوری اور پینا جیسے دریاؤں کو آپس میں جوڑنے سے آندھرا پردیش، تلنگانہ، کرناٹک، مہاراشٹرا، اوڈیشہ، تمل ناڈو اور پڈوچیری کو فائدہ پہنچ سکتا ہے۔ دریا جوڑنے کے اس پروگرام کے لیے نیشنل پرسپیکٹو پلان (این پی پی) تیار کیا گیا ہے، اور اس کے نفاذ کی ذمہ داری نیشنل واٹر ڈیولپمنٹ ایجنسی (این ڈبلیو ڈی اے) کو دی گئی ہے۔
پورے ملک میں 30 بین الریاستی دریا جوڑنے کے منصوبوں کی نشاندہی کی گئی ہے، جن میں سے 11 کے تفصیلی منصوبہ جاتی رپورٹس (ڈی پی آر) مکمل ہو چکے ہیں جبکہ باقی کے فیزیبلٹی اسٹڈیز مکمل کیے جا چکے ہیں۔ اس پروگرام کا مقصد سیلاب زدہ دریائی علاقوں سے اضافی پانی کو خشک سالی سے متاثرہ خطوں تک منتقل کرنا ہے، تاکہ خشک سالی اور سیلاب دونوں کے اثرات کو کم کیا جا سکے۔
وزیر نے مزید کہا کہ پیچیدہ علاقوں میں سیلاب سے نمٹنے کے لیے مرکز تکنیکی رہنمائی اور مالی امداد فراہم کرے گا۔ انہوں نے یہ بھی بتایا کہ منی بھدرا اور انچم پلی پراجیکٹس پر ریاستوں کے درمیان تاحال اتفاق نہ ہونے کے سبب گوداوری کے پانی کی منتقلی کے لیے متبادل مطالعے کیے گئے ہیں۔
About the Author
