حیدرآباد: ورنگل شہر مونتھا طوفان کی مسلسل بارشوں کے بعد جمعرات کو مکمل طور پر زیرِ آب آگیا۔ طوفان کے نتیجے میں گھروں اور سڑکوں میں پانی بھر گیا، جبکہ تین شہروں ورنگل، ہنمکنڈہ اور قاضی پیٹ کی عام زندگی مفلوج ہوکر رہ گئی۔
اگرچہ بارش رک گئی، مگر پانی اب بھی کئی علاقوں میں جمع ہے۔ متعدد کالونیوں میں گھروں کے اندر پانی داخل ہوگیا، اور شہری کمر تک پانی میں چلنے پر مجبور ہوگئے۔ ہنمکنڈہ کی سڑکیں ندیوں کا منظر پیش کر رہی ہیں جبکہ ورنگل ریلوے اسٹیشن مکمل طور پر پانی میں ڈوبا ہوا ہے۔
40 سے زائد کالونیاں متاثر | Warangal Floods
سیلابی پانی نے شہر کی 40 سے زیادہ کالونیوں کو اپنی لپیٹ میں لے لیا۔ بھدراکالی روڈ کے قریب سرسوتی کالونی اور ورنگل انڈر برج میں شدید پانی جمع ہوگیا۔ سائی گنیش کالونی، سنتوشی ماتا کالونی، ڈی کے نگر، این این نگر، مائیسیا نگر اور سامّیا نگر میں گھروں کے اندر پانی داخل ہوگیا۔
ورنگل کی کلکٹر ستیہ شاردا کے مطابق ضلع میں 29 سینٹی میٹر بارش ریکارڈ کی گئی۔ انہوں نے بتایا کہ انتظامیہ نے دو دن پہلے ہی حفاظتی اقدامات شروع کر دیے تھے۔ تمام اسکول اور بازار بند کر دیے گئے، جبکہ ریسکیو ٹیموں نے حاملہ خواتین اور مریضوں کو محفوظ مقامات پر منتقل کیا۔
راحت مراکز میں منتقلی اور امداد | Warangal Floods
کلکٹر نے کہا کہ نشیبی علاقوں کے مکینوں کو ری ہیبیلیٹیشن مراکز منتقل کر دیا گیا ہے۔ ریلیف ٹیمیں متاثرہ علاقوں میں کھانے پینے کی اشیاء اور ضروری سامان تقسیم کر رہی ہیں۔
ضلعی انتظامیہ نے ہدایت دی ہے کہ پانی کی سطح کم ہونے تک تمام محکمے چوکسی برقرار رکھیں، تاکہ کسی بھی ہنگامی صورتحال سے فوری نمٹا جا سکے۔
About the Author
