حیدرآباد: بوئن پلی کے 73 سالہ بزرگ شہری 33.4 لاکھ روپئے کے ایک پیچیدہ Cybercrimeکا شکار ہو گئے۔ یہ واقعہ 25 جولائی سے 8 اگست کے درمیان پیش آیا جب دھوکہ بازوں نے خود کو اعلیٰ قانون نافذ کرنے والے اور سرکاری افسران کے طور پر پیش کیا۔
سائبر کرائم پولیس کے مطابق متاثرہ شخص کو سب سے پہلے ایک فون کال موصول ہوئی جس میں کال کرنے والے نے خود کو کرناٹک کرائم برانچ کا انسپکٹر بتایا۔ اس نے دعویٰ کیا کہ متاثرہ شخص کا آدھار نمبر فحش مواد اور انسانی اسمگلنگ کے مقدمات سے منسلک ہے۔ دھوکہ بازوں نے جعلی قانونی دستاویزات بھیجے اور متاثرہ شخص و اس کی اہلیہ کو دھمکایا کہ وہ کسی کو یہ بات نہ بتائیں۔
اعلیٰ افسران کی نقالی
چند دن بعد ایک اور دھوکہ باز نے مشہور ممبئی پولیس افسر دیا نائیک کے نام سے رابطہ کیا۔ اس نے متاثرہ شخص سے 15 لاکھ روپئے کا مطالبہ کیا، یہ کہتے ہوئے کہ رقم کی تصدیق لازمی ہے تاکہ اس کا نام صاف کیا جا سکے۔ لگاتار دباؤ اور بار بار کی دھمکیوں کے نتیجے میں متاثرہ شخص نے کئی قسطوں میں رقم منتقل کر دی۔
تحقیقات میں انکشاف ہوا کہ فراڈیوں نے سپریم کورٹ آف انڈیا اور انکم ٹیکس ڈپارٹمنٹ کی جعلی دستاویزات بھی تیار کیں تاکہ متاثرہ شخص کا اعتماد حاصل کیا جا سکے۔ اس دھوکہ دہی کے اختتام پر کل 33.4 لاکھ روپئے لوٹ لیے گئے۔
مقدمہ درج، تحقیقات جاری
بعد ازاں متاثرہ شخص نے شکایت درج کرائی جس کے بعد حیدرآباد سائبر کرائم پولیس نے مقدمہ درج کر کے تحقیقات شروع کر دی ہیں۔ حکام نے کہا کہ رقم کے بہاؤ کا سراغ لگانے اور دھوکہ بازوں کی شناخت کے لیے کوششیں جاری ہیں۔ پولیس نے عوام کو متنبہ کیا کہ اصل پولیس یا عدالتیں کبھی بھی کسی انکوائری کے نام پر رقم منتقل کرنے کا مطالبہ نہیں کرتیں۔
About the Author
