حیدرآباد: حیدرآباد نارکوٹکس انفورسمنٹ وِنگ (ایچ این ای ڈبلیو) اور چادر گھاٹ پولیس کی مشترکہ کارروائی میں 4 ڈرگ پیڈلرس کو گرفتار کیا گیا اور 74 بوتلیں Mephentermineسلفیٹ انجکشن برآمد ہوئے جن کی مالیت تقریباً 1.28 لاکھ روپئے بتائی گئی۔ اس کارروائی میں 4 موبائل فون بھی ضبط کیے گئے جو اس ریکٹ میں استعمال ہو رہے تھے۔
پولیس کے مطابق گرفتار شدہ افراد کی شناخت محمد عمران علی عرف کالا عمران (32)، ملک پیٹ کا رہائشی اور روڈی شیٹر؛ رنگا شنکر گوڑ (65)، برکت پورہ کا میڈیکل اسٹور مالک؛ ڈی ریتیش کمار (32)، کاچی گوڑہ کا اپولو فارمیسی ملازم؛ اور اس کا چھوٹا بھائی ڈی موہت کمار (31)، فنانس ریکوری ایجنٹ کے طور پر ہوئی ہے۔
تحقیقات میں پتہ چلا کہ عمران علی خود بھی میفینٹرمن کا عادی ہے اور وہ یہ نشہ آور انجکشن دہلی کے ایک بین الریاستی سپلائر اور مقامی ذرائع سے حاصل کرتا تھا۔ ریتیش اور موہت، شنکر گوڑ سے یہ انجکشن خریدتے تھے، جو اپنے میڈیکل اسٹور سے بغیر نسخہ فروخت کرتا تھا۔ یہ گروہ ان انجکشن کو زیادہ قیمت پر شہر کے مختلف حصوں میں فروخت کرتا اور عیاش زندگی کے اخراجات پورے کرتا تھا۔
ایچ این ای ڈبلیو حکام نے عوام سے اپیل کی کہ وہ منشیات کے نقصانات کے بارے میں چوکس رہیں اور خاص طور پر والدین اپنے بچوں پر نظر رکھیں تاکہ ان میں منشیات کے رجحان کو روکا جا سکے۔ پولیس نے کہا کہ عوام ڈرگ سے متعلق کسی بھی اطلاع کو ہیلپ لائن نمبر 8712661601 پر فراہم کریں کیونکہ کمیونٹی کی شمولیت ہی ڈرگ فری حیدرآباد کے قیام کے لیے ضروری ہے۔
