حیدرآباد: نامپلی کی ایک عدالت نے مرکزی وزیر مملکت برائے داخلہ امور بنڈی سنجے اور تلنگانہ کے وزیر آبپاشی اُتم کمار ریڈی کے خلاف مختلف فوجداری مقدمات میں پیشی سے غیر حاضری پر Non-Bailable Warrants جاری کیے ہیں۔
اُتم کمار ریڈی کے خلاف 2019 کے ضمنی انتخابات کے دوران ماڈل کوڈ آف کنڈکٹ کی خلاف ورزی کا مقدمہ درج ہے، جو نیروڈوچرلہ پولیس اسٹیشن میں درج کیا گیا تھا۔ متعلقہ مقدمہ کی سماعت مقررہ تاریخ پر ہونی تھی، تاہم وزیر موصوف عدالت میں حاضر نہیں ہوئے۔ عدالت نے اب سماعت کی اگلی تاریخ 7 اگست مقرر کی ہے۔
دوسری جانب بنڈی سنجے کے خلاف ناقابلِ ضمانت وارنٹ 2022 میں میر یالا گوڑہ کے ایک دھان خرید مرکز پر پیش آئے تصادم کے سلسلے میں جاری کیا گیا ہے۔ اُس وقت وہ بی جے پی کے ریاستی صدر تھے اور کسانوں کو اقل ترین امدادی قیمت دلانے کے مطالبے پر احتجاج کی قیادت کر رہے تھے۔ اس احتجاج کے دوران بی جے پی اور بی آر ایس کارکنوں کے درمیان جھڑپ ہوئی تھی، جس میں کئی افراد کے زخمی ہونے کی اطلاع ملی تھی۔ عدالت نے اس مقدمے کی اگلی سماعت 13 اگست کو مقرر کی ہے۔
بنڈی سنجے کے خلاف ایک اور علیحدہ مقدمے میں، جو کہ حضورآباد میں ماڈل کوڈ آف کنڈکٹ کی خلاف ورزی سے متعلق ہے، ایک اور ناقابلِ ضمانت وارنٹ جاری کیا گیا ہے۔ ان کے وکیل کروناساگر نے عدالت میں وارنٹ کی منسوخی کے لیے درخواست داخل کی ہے، جس پر سماعت 30 جولائی کو مقرر ہے۔
About the Author
