حیدرآباد ۔ سابق وزیر اور بی آر ایس کے سینئر لیڈر جگدیش ریڈی نے پیر کے روز وزیر اعلیٰ اے ریونت ریڈی پر سخت تنقید کرتے ہوئے کہا کہ وہ خود اپنے سیاسی مستقبل کے بارے میں غیر یقینی صورتحال میں ہیں لیکن عوام کو Future City کے خواب دکھا رہے ہیں۔ انہوں نے الزام لگایا کہ کانگریس حکومت ترقی کے نام پر دراصل رئیل اسٹیٹ کے سودے آگے بڑھا رہی ہے۔
جگدیش ریڈی نے دعویٰ کیا کہ ریاستی حکومت نے حیدرآباد میٹرو سے ایل اینڈ ٹی کو دستبردار ہونے پر مجبور کیا اور اس فیصلے سے 1,000 کروڑ روپۓ سے زیادہ کا منافع کمایا گیا، جبکہ عوام پر 15,000 کروڑ روپۓ کا اضافی بوجھ ڈالا گیا۔ ان کے مطابق 35,000 کروڑ روپۓ مالیت کے میٹرو اثاثے اڈانی اور میگا گروپ کے حوالے کرنے کی منصوبہ بندی کی جا رہی ہے۔
حکومت کی کارکردگی اور بی آر ایس کا تقابل
سابق وزیر نے کہا کہ میٹرو عام عوام کے لئے ناقابل رسائی بنتی جا رہی ہے۔ انہوں نے طنز کرتے ہوئے کہا کہ وزیر اعلیٰ ان علاقوں میں سڑکیں اور میٹرو بڑھانے کی بات کر رہے ہیں جہاں نہ مکانات ہیں نہ ہی کوئی آبادی۔ ان کے مطابق یہ مستقبل کا شہر نہیں بلکہ بے مستقبل شہر ہے۔
انہوں نے مزید کہا کہ کانگریس کے اقتدار میں آنے کے بعد ریاست کی سڑکیں خستہ حال ہو گئی ہیں اور کہیں ایک بھی مٹی کا ڈھیر تک نہیں ڈالا گیا۔ ان کا کہنا تھا کہ عوام کو اب یہ بھی یقین نہیں رہا کہ بلدیاتی انتخابات ہوں گے کیونکہ حکومت پر اعتماد ختم ہو گیا ہے۔ انہوں نے بی سی طبقات سے دھوکہ دہی اور عوام پر اپنے ایجنڈے کے نفاذ کا بھی الزام لگایا۔
جگدیش ریڈی نے سابق وزیر اعلیٰ کے چندر شیکھر راؤ کے منصوبوں کو یاد کرتے ہوئے کہا کہ انہوں نے حیدرآباد کے لئے 50 برسوں کی ضرورتوں کو مدنظر رکھتے ہوئے میٹرو کے تین مراحل طے کئے تھے اور کابینہ میں اس پر تفصیلی بحث ہوئی تھی۔ اس منصوبے کا مقصد شہر کے تمام حصوں کو بشمول شمش آباد ایئرپورٹ میٹرو سے جوڑنا تھا۔
انہوں نے کہا کہ اس کے برعکس کانگریس وزراء اور قائدین متضاد بیانات دیتے ہیں۔ مثلاً وزیر کومٹی ریڈی وینکٹ ریڈی نے پہلے ٹرپل آر روڈ کی تکمیل کا وعدہ کیا لیکن متاثرین کو بعد میں بتایا کہ منصوبہ جلد مکمل نہیں ہوگا۔ اسی طرح فلم ٹکٹ قیمتوں میں اضافہ کے فیصلے سے لاعلمی ظاہر کی گئی۔ دیگر وزراء اور ارکان اسمبلی نے بھی مختلف معاملات میں حکومت کی پالیسیوں پر سوال اٹھائے۔
Future City کو لے کر تنقید کے بعد جگدیش ریڈی نے طنزیہ انداز میں کہا کہ کیا یہ حکومت واقعی انتظام چلا رہی ہے یا پھر ایک سرکس۔
Live: BRS Leaders Press Meet at Telangana Bhavan.@jagadishBRS @balkasumantrs https://t.co/nQlJtKY28Q
— BRS Party (@BRSparty) September 29, 2025
