Hyderabad: Telangana ke Chief Minister A. Revanth Reddy ne Friday subah Andhra Pradesh ke zila Kurnool mein hua dehshatnaak bus haadsa par ghera afsos aur dukh ka izhar kiya hai. Hyderabad se Bangalore jaane wali Kaveri Travels ki bus NH-44 par Chinna Tekur ke paas aag mein jal kar tabah ho gayi, jismein 20 se zyada musafir jaa’n se haath dho baithe.
Chief Minister ne haadse mein halaak hone walon ke khandan se dil se hamdardi ka izhar kiya aur mutasir afraad ko foran madad faraham karne ki hidayat di.
Revanth Reddy ne aham afsaron se report talab ki
Revanth Reddy ne Chief Secretary Ramakrishna Rao aur DGP Jitender se phone par baat karte hue haadse ki tafseelat par mabni ek mukammal report ki darkhwast ki. Unhon ne Gadwal zila ke Collector aur SP ko hidayat di ke wo foran moqa-e-wardaat par pahuchein aur rescue operation ki nigrani karein.
Aghaz-e-tahqiqat ke mutabiq yeh haadsa subah 3 baje ke qareeb hua jab bus mein achanak aag lag gayi. Authorities ne bataya ke ab tak malko se 11 laashein nikali ja chuki hain, jabke zyadatar musafiron ka taluq Hyderabad se hai.
Andhra authorities se rapt, help line qaim karne ka hukm
CM ne Andhra Pradesh ke officials se bhi rapt kiya aur laashein shanakht karne ke process mein tamam mumkin cooperation ka kaha. Unka kehna tha ke dono riyasaton ke departments ko mil kar mutasir khandanon ko har mumkin madad deni chahiye.
Is ke ilawa, Revanth Reddy ne foran ek helpline number qaim karne ki hidayat di taake halaak aur zakhmi musafiron ke khandanon tak bar waqt maloomat aur sahulat pahu’nchayi ja sake.
